Tuesday, February 19, 2008

التغييييييير

بسم الله الرحمن الرحيم
التغيير
التغيير لابد منه فى الحياه ممكن الواحد يغير عشان ينسى اللى فات
وممكن الواحد يغير عشان بيتخنق من اللى معاه
وممكن الواحد يغير لان ده غريزة اساسية فى الانسان
أنا بقى قررت إنى أغير عشان كل حاجه فى حياتى
أولا
غيرت الموبايل لان الموبايل البقاء لله من يوم ما اللى حصل حصل وانا قمت خبطه فى الحيطه بس الحمد الله رجع حته واحده
قررت أبيعه لانى عايز أغير
الحمد الله حصلت على موبايل تانى بس بعد ما دفعت كل
اللى معايا فيه وكان تمنه 2100 جنيه مصرى لا غير
كنت محوشهم عشان اروح اخطب بيهم
بس قلت خلاص الموبايل أولى
جبت موبايل N73
اللى هو ده

تانى حاجه هغيرها هى طريقة حياتى
خلاص اللى راح راح وسابنى
قررت انى أشوف شغلى وبس
مش عايز حاجه تانية بقى دلوقتى
واللى يجيبه ربنا كويس
مش عراف أقول ايه بس كل جديد فى حياتى هقوله لان رأيكم بيفيدنى اوى
آه نسيت حاجه عايز أقولها
أنا بطبيعتى مش بحب لتغيير بالمرة بس الظروف اللى بتخلى الإنسان يغير
ولما ييجى الوقت للتغيير مش تتردد بجد غير لان ممكن يقلب عليك

29 comments:

aya said...

غاليى محمد

اولا
مبروك على الموبايل انه بقى بتاعك
وربنا يديك خير ويكفيك شره يا رب ان شاء الله
ثانيا

التغيير:

اتعلم
يقشعر بدنى لمجرد رؤيا تلك الكلمة
اخشاها للغاية
فانا اكره التغغير
واخشاه

لا اؤمن بان التغيير يكون للاحسن
فكل التغييرات التى رايتها ومررت بها كانت دائما نحو الاصعب والاكثر ايلاما

ولكنه
على رغم من اعتراضى انا عليه
فان التغيير لازال مطلوبا
وهاما للغاية
بل ان حياتنا دون التغيير لا تعنى الكثير

اخى

ادعو الله من قلبى ومن اعماض قلبى ان يهيدك الطريق الصحيح الذى ينتزع منك ما مضى
ويلملم شتاتك ويوجهك نحو الخير

ومحمد تذكر جيدا قول الله تعالى
قل لن يصيبنا الا ما كتب الله لنا

وربنا يديك كل الخير فانت اهل له

دمت فى رعاية الله اخى الغالى

Unknown said...

مش عارفة اقولك البقاء لله وربنا يصبرك ولا مبروك ع الموبايل الجديد ولا جدع وشاطر عشان قررت التغيير

ربنا يعينك ع التغير ويوفقك يارب .. اللهم آمين


سلام

همسات دافئه said...

محمد
انا عارفه انى معلقتش عندك بقالى كتير بس انا مفتنيش ولا بوست الفكره انى بس مكنتش عارفه أقول ايه
بجد يامحمد هو ده افضل حل وانا مبسوطه جدا انك وصلتله غير بجد كل حاجه فى حياتك غير حتى الطريق الى بتروح منه شغلك غير الناس الى بتقابلهم وبجد هتكتشف حاجات جديده وهتتحس كتير
ربنا يقويك ويعينك بجد بدعيلك من قلبى
تحياتى واعتذارى
شيماء

Empress appy said...

اولا مبروك الموبيل يا بطل
ثانيا التغير حلو فى كل حاجه بس ميكونش سمه عندك وفى نفس الوقت لازم يبقى كل فترة انما فترات متباعده شويه علشان الملل ولازم تججد دايما اللى حوليك وحياتك وربنا معاك

S H A H said...

غير يا بوحميد غير يا نجم

عقبال ال
E90
والعربية و الشقة ان شاء الله

و عقبال ما تلاقي بنت الحلال اللي تساهلك, و يكون اخرة صبرك خير

والله يا بوحميد بوست حبيبتي ماتت لسة مأثر فيا

Noony said...

التغيير مطلوب برضه
مبروك الموبايل
وربنا يعوضك خير إن شاء الله

نوني

dina said...

مبروك الموبايل..و بعدين انات مرة واحدة..طب كنت تجيب اى حاجة كدا محندقة و تخلى الفلوس للخطوبة

يلا ما علينا..الغالى تمنه فيه بردو و الف مبروك..و على فكرة اى حد بيحتاج لتغيير فى حياته حتى اللى مش بيزهقوا بسرعة بييجى وقت عليهم بيحسوا ان لازم حاجة جديدة تحصل تكسر الروتين شوية....و اعتقد ان تغيير اى حاجة فى الدنيا بيعلمنا اكتر

Anonymous said...

مش عارف انا حاسس بالذنب تجاهك وحاسس اني سبب في حاجات كتير بتحصل للناس
مش عارف اعمل ايه ولا ايه
حكايات

Anonymous said...

مبروك الموبيل التغيير حاجة كويسة اوي بالذات لما يون الانسان محتاجلة في وقت حزه ن لازم نخرج من الحالة اللي نكون فهيا

تحياتي وربن جعل كل ايامك اللي جاية حلوة

غني يابهيه said...

انا شخصيا معايا الموبيل ده واحب اقول لك مبروك فى اول زياره ليا

عروسة ننوسة said...

طبعا مبروك على الموبايل ....التغير فعلا مهم فى حياة الانسان جدا لكن مش كل حاجة بتحتاج التغير يعنى مثلا الواحد لما يزهق من مراته يغيرها ولا ايه؟؟؟؟
هههههههههههههههههههه

و القادم....أجمل said...

أولا البقاء لله وحده
و التغير لابد منه
مينفعش تقضي حياتك كلها كده
ربنا يعينك و يقويك

فزلوكة said...

أولا : مبرووك الموبايل

بداية جديدة إن شاء الله, تحقق فيها كل ماتتمناه

جميل التغيير بس يكون للأفضل , والأهم إنه يكون مدروس

ربنا يكرمك يارب

Desert cat said...

التجديد مطلوب من لا يتجدد يتجمد
بس التجديد دايما لازم يكون للأفضل وربنا يوفقك

تائهة فى أرض الأحلام said...

مبروك على الموبايل

عقبالى يارب
بس انا بقى عايزة اغير حياتى كلها الايام ديه واغير اللى حوليا كمان واغير البلد
علشان الايام ديه عندى حالة ملل

ادعى لى

semsem said...

طيعا
ميروك الموبيل

انا عن نفسى يحي التغير التغير بيخلق فرص اكتر

وبيعلم حاجات احسن

مبروك عليك التغيرر

3abdo me7tas said...

aya
ربنا يكرمك يا رب وعقبالك لما تجيبي موبايل جديد

ثانيا
التغير شئ جميل بس مش فى كل الأحوال زى ما قلت
بس ساعات الإنسان بيكون التغير حاجه رئيسية لازم تحصل فى حياته عشان تحميه
انا مش بحب التغيير وصعب انى اتغير بس دى الفرصة الوحيده اللى ممكن تخلينى أعيش حياه كويسه

............

إنسانه

البقاء والدوام لله
الله يبارك فيكى
شكرا على الجدعه والشطرنه اللى انتى بتقوليها
ربنا يكرمك يا رب

3abdo me7tas said...

همسات دافئة

شيماء انا عارف ان مفيش ولا بوست فاتك بس انا ساعات بكتب بوستات بكون عايز فيها رأى أصحابى رأى اى حد يدخل البلوجر حتى ولو كان مين
اما التغيير
زى ما انا قلت
ويا ريت تبقى تزورينا علطول ونسمع رأيك فى كل موضوع بإذن الله
جزاك الله كل خير

...................

Appy

الله يبارك فيكى يا ستى
لا متخفيش التغيير مش سمة عندى ولا حاجه وزى ما قلت فيه حاجات لازم فيها التغيير
ربنا يكرمك

3abdo me7tas said...

Shah

ازيك يا شهرام انت فين يا جدع والله واحشنى
يا رب يا خويا ألاقى كل اللى انت بتقوله ده
بس انت عارف هييجو ازاى شد حيلك معايا انت بس
;)
انت فاهمنى ها

...........

نونى

ازيك يا نهاد أخبارك ايه
الله يبارك فيكي يا ستى عقبالك
ما انتى كمان معاكى موبايل جامد
ربنا يكرمك يا رب ويرزقك بالحلال

3abdo me7tas said...

Dina

والله يا أختى دينا انا كان معايا تليفون محندق بس بعته وقلت اخش الموسوعه الإنيه ونشوف أخبارها

خلينا نشوةفك هنا علطول

..............
Anonymous

لو انتى اللى فى بالى يبقى اقولك لا انتى ملكيش دعوة بأى حاجه وانتى عارفه كده
اما لو انتى كنتى الإنسانه التانية اللى فى بالى أقدر أقولك
اتحرقى
طبعا كل واحد عارف الرسالة متوجهه لمين
معلش للفظ سبينى فى حالى بقى
الكلام ده للشخص التانى اما الاولانى مش ليكي وانتى عارفه

3abdo me7tas said...

أيامنها الحلوة

الله يبارك فيكي
ربنا يكرمك يا رب

.........

جمهورية مصر العربية

ماشى يا سيدى يا بتاع بهيه

3abdo me7tas said...

Gannah

ازيك يا ست العروسة
الله يبارك فيكي
لا انا بالنسبة لتغيير الزوجات مش من الراجل معلش دى من المرأة هى اللى تخلى جوزها يكون عايز يغير ولا لآ
ربنا يكرمك يا رب

...........

والقادم أجمل

البقاء والدوام لله
ربنا يكرمك

..........

فزلوكة

أولا انتى اهلا وسهلا بيكي فى المدونة
ثانيا الله يبارك فيكي

3abdo me7tas said...

Desert Cat

ازيك
باذن الله التجديد للأفضل دايما
محدش بيرجع لورى

...........

تائهة فى أرض الأحلام

الله يبارك فيكي
لا ان شاء الله هتقدرى تغيرى الحاجات اللى انتى بتقوزليها دى بس صعب تقريبا انك تغيرى البلد
والملل حاجه أساسية برضه لولا الملل مكناش حسينا بعكس الملل هههه معلش مش فاكر عكسها دلوقتى
ربنا يكرمك يا رب

3abdo me7tas said...

semsem

الله يبارك فيك

عقبالك
:D







>>>>>>>>>>>>>>

الرد ده لحبيبه قلبى دنيا الله يرحمها انا عارف لو كانت هى عايشه لغاية دلوقتى كانت هترد عليا وكنت عارف كانت هتقوله ايه
انا بقولك انتى وحشتينى اوى يا بت بجد وحشتينى
ربنا يرحمك

زى الهوا said...

قريت البوستات اللى فاتت ومش عارفة اقولك ايه بصراحة , ربنا يصبرك

Anonymous said...

اول حاجه مش انا اللى رديت الرد الاولانى ده

تانى حاجه مش انا سبب اللى انت فيه دلوقتى اصلا .. انت الوحيد السبب .. نصيبك .. المكتوب لك
دى حاجه بتاعت ربنا

تالت حاجه لو الشتيمه دى متوجهه ليا انا فأنا بقولك شكرا لانى عمرى ما غلطت فيك لا قدامك ولا من وراك

اه صحيح نسيت اقولك مبروك على الموبيل

د/اجدع بنوته said...

ياشيخخخخخخخخ

حد يضحى بخطوبه علشان موبايل

طب كنت اشترى بيهم لاب توب

احسن

هههههههههههههه

ع كلا تغيير موفق

غمض عينيك said...

ربنا يعينك

klmat said...

احيانا التغيير بيكون ضروره
يارب يكون الجاى كله خير
والتغيير من سنن الحياه
مبروك الموبايل وربنا يوفقك
ويكتب لك كل خير يارب
لانك جدير بكده
خالص تحياتى