Monday, December 31, 2007

2008


ازيكو عاملين ايه والله ليكو وحشه
انا قلت كده أختم السنه دى ببوست كده على السريع
المهم انتو عاملين ايه وأخباركم
نخش على الموضوع

امبارح لقيت الحاج اللى هو والدى يعنى داخل عليا

الحاج : انت متعرفش
عبده المحتاس : لا والله خير ايه اللى حصل
الحاج : فيه واحده ماتت عندنا النهاردة بانفلونزا الطيور
عبده المحتاس : امتى الكلام ده
الحاج : لسه دلوقتى
عبده المحتاس : أهلا يبقى مفيش أكل فراخ
مع العلم ان الأخ عبده المحتاس يموت فى حاجه اسمها فراخ

وخرج عبده المحتاس من المنزل والدموع تسيل على خديه ومشى زى الأهبل فى البلد ويقول
الكيلو ب 6.5 والحسابة بتحسب

مع العلم ان كيلو الفراخ كان وصل لـ 6.5 جنيه مصرى لا غير

مش عارف ايه اللى بيحصل هو احنا هنلاقيها من الفراخ ولا العيش ولا الدقيق ولا ايه ولا ايه
ندخل على موضوع تانى

العيش والدقيق

الحاج : انت متعرفش
عبده المحتاس : فيه ايه تانى يا حاج خير ايه اللى حصل
الحاج : مش طن الدقيق زاد 300 جنيه
عبده المحتاس : تانى مش لسه زايد بقاله شهر
الحاج : رغيف العيش الأبيض بقى ب 20 قرش ورغيف العيش المدعم هيبقى بكره بـ 10 قروش
عبده المحتاس : يعنى جيت على العيش يلا ما كل حاجه بقت نار

وخرج عبده المحتاس من منزله القاطة فى المنصورة والدموع تملأ عيونه ويقول بأعلى صوت
الرغيف بـ 10 صاغ والحسابة بتحسب

طيب نعمل ايه بس يعنى الواحد بيشتغل وطالع عنيه عشان عايز يتأهل بقى زى الناس اللى متأهلة يقوم العيش يبقى بـ 10 صاغ ولا الفراخ اللى عندها برد دى

ربنا يستر علينا بقى

الواحد حاسس ان أبوه شغال مع المباحث الأيام دى كل الأخبار طازة بتبقى عندى إيه الحلاوة دى طيب يا حاج انا عايز خبر حلو كده ولذيذ تقولى أنا جبت لك عروسه تقولى انا جبت لك شقه انا جبت عربية أى حاجه يا حاج كده

ربنا يخليه ليا يا رب

كل حاجه قت ولعه فى سنه النحس العالمى 2007 لما نشوف 2008 جايبة معاها إيه هى كمان ربنا يستر

نيجي بقى ونقول إيه اللى عمرى ما هنساه فى سنه 2007

قعدت شهر ونص فى السرير أثر مرضى بفيرس البروسيلا اللعين
والحمد الله بقيت تمام دلوقتى
خسرت حاجات كتير ملهاش لازمة إنى أذكرها
جالى إستدعى للجيش
إنتقلت من مهنه المهندس إلى مهنة المندوب بعد تفكير أخذ سنين
فرص سفر وضيعتها من إيدى
حاجات كتير مش فاكرها
على العموم اللى عايز يقول أهم المواقف اللى قابلته فى سنه 2007 يقولها أهو ممكن نتعلم منها صح ولا أنا غلطان
أشوفكم بقى السنه الجاية إن شاء الله :D

Saturday, December 15, 2007

بدون عنوان


الأول بحب أشكر الناس اللى فاكرة عيد ميلادى وقالت ليا كل سنه وانت طيب
أولهم طبعا نفرتيتي صاحبة مدونة بنت الفراعنة
ونفرتيتي أول واحده قالت ليا كل سنه وانت طيب
ثانيهم بالترتيب اللى قالى كل سنه وانت طيب آية صاحبة مدونه بلا نيلة
ثالثهم أختى هالة شبايك صاحبة مدونة رحيق الحب
بجد هم دول بس اللى إفتكرة عيد ميلادى أو بمعنى أصح هم اللى قالو ليا كل سنه وانت طيب سواء فكرتهم او بطريقة أخرى
على رأى هالة الواحد بيصعب عليه نفسة لما هو بيسأل عن الناس والناس مش بتعبره او بتسأل عليه لأن فيه ناس كتير مكنت متنتظر منهم إنهم يقولو كل سنه وانت طيب على الأقل لاكن الله أعلم ظروف أو أو أو المهمكل واحد بقى إن شاء الله ياخد حقه زى ما بيدى طبعا بعض الناس مش كل الناس
المهم وانتو طيبين للناس اللى مكنتش عارفه
نخش بقى فى الموضوع الأصلى وهو إيه اللى حصلى فى الإستدعى

بسم الله الرحمن الرحيم

أول يوم فى الإستدعى كان يوم 11/11 طبعا أنا معرفتش أروح أول يوم لأن أعصابى كانت بايظة بجميع المقاييس لإنى كنت لسه شغال و و و حاجات كتير يعنى المهم وصلت السويس يوم 12/11سلمت نفسي وقدمت الورق وكله تمام ورجعت المكان اللى انا كنت فيه أيام الجيش مع المقدم فى العمليات من الآخر أنا كنت كل اللى بعملة فى الإستدعى آكل شارب نايم قاعد فى الكانتين بتفرج على الدش وبس
زى ما تقولو كده واسطة او عشان احنا شيلنا العمليات فى الجيش يعنى فده تقدير لينا
المهم
الناس التانية بقى اللى راحو المشروع إتبهدلو أحلى بهدله كان التعيين رغيف عيش الا ربع فى اليوم وآكل بسيط جدا والكانتين بتاع المشروع رغيف عيش وحته برنجان رومى بجنيه يعنى بهدلة بهدلة
ده بالنسبة للإستدعى
المواقف بقى اللى قابلتنى واللى أنا سمعهتا من الناس هناك على اللى حصل بعد ما خلصت جيش
الموقف الأول واللى خلانا نتأخر يوم كامل على التسليم
إن كان فيه إستدعى فى شهر 2 اللى فات وكان واحد من الناس بتاع الإستدعى كان هرب من الكتيبة عشان يخرج السويس
وطبعا السكة الحديد قدام اللواء علطول وهو خارج القطر داسه بعدها بكام يوم لقو جثته أو بمعنى أصح نصه اللى فوق من غير الإيد اليمين والغربان واكله وشه والنص التحتانى بعيدة شوية من غير الرجل الشمال طبعا الجيش كله اتقلب لغاية ما عرفو ان العسكرى ده استدعى وده موقف
الموقف التانى بقى وده الأصعب
سمعت حكايات عن واحد قضى حوالى 6 سنين جيش إزاى بقى كان كل مرة يتمسك بمخدرات فكان بيتحبس فى السجن الحربى
قضاها سجن من الآخر وكان بيتعمل فيه حاجات انا مقدرش أقولها فى السجن ده
كنت سمعت زمان ان فى السجن ده صف الظباط كانو بياخدو العساكر من السجن فى عز الشتا ويخلوهم ينزلو فى براميل ميه متلجة فى عز التلج فى الفجر يعنى موت بجد ليه مش عارف دا سمعته لاكن مش شوفت بعينى والله أعلم
الموقف التالت
العنبر اللى كنا بنام فيه أنا مكنتش بستريح ليه نهائيا زى ما تقول مسكون ولا فيه حاجه مش عارف
حكاية والعيال حلفو انها حصلت
واحد داخل العنبر بليل وهو بيفتح الباب لقى واحد بيقولو ادخل واقفل الباب
إزاى يعنى والعنبر فاضى مفهوش مخلوق بيقولو ان الواد اتسمر فى مكانه خمس دقايق تقريبا وبعدين طلع يجرى ووشه أصفر زى اللمونة
مرة تانية واحد كان نايم لقى ناس بتعدى من جنبه
مرة تانية واحد نايم لقى ناس شايلة قفص وحطته على الشباك اللى جنبه ومشو قام يشوف القفص ملقاش حاجى خالص
أنا اول يوم روحت أنام فى العنبر ده والله والله والله انا وأنا نايم كنت حاسس إن فيه حد مكتفنى ومعرفتش أنام خالص لغاية ما قلت لا وانا هتعب نفسي ليه قمت قايم ونايم فى حته تانية مش خوف والله لاكن انا كنت ساعتها عايز انام لانى تعبان اوى
طبعا وانا فى الإستدعى كان فيه ناس وأنا بعتبرهم زى إخواتى بالظبط وأكتر والله كانو بيتصلو بيا بيطمنو عليا وكده يعنى
أنا بشكرهم بجد أوى أوى أوى وبقولهم ربنا ميحرمنيش منكم يا رب ويكرمكم بإذن الله
مش عارف أقول إيه تانى بس أنا والله بكتب ومش شايف قدامى
خلو بالكم منى بقى
:P
لو إفتكرت حاجه تانية هكتبها

Wednesday, December 12, 2007

وجبنا أبو كاميرا يا ردالة


السلام عليكم
أنا بصراحة دلوقتى فيه حوالى من 3 الى 153 موضوع عايز أتكلم فيهم
حصلى حاجات كتير اوى اوى اوى الأيام اللى فاتت
من أول ما رحت الإستدعا لغاية يومنا هذا :)

يااااااااااااااه الأيام جرت عليا اوى
أكنى امبارح كنت بكتب انى رايح الإستدعى بكره
اهو الإستدعا راح من زمان والواحد رجع الشغل تانى وكمان قبضت محدش يقولى هات سلفية ولا حاجه
لانى عقبال عندكم جبت موبايل جديد من أبو كاميرا ده اللى نزل حدانا فى الكفر وخلاص علقنا الموبايل القديم على الرف وغير معروض للبيع أو ان حد يستلفه لان معاه ذكريات كتيرة اوى اوى اوى فعاينه على الرف
طبعا الكل عايز يعرف الموبايل القديمة ايه ودلوقتى جبت موبايل إيه
أقولكم
دى الصور
أنا بقول بلاش نحط صورة الموبايل القديم
المهم هو كان 3310
أما بقى الموبايل الجديد فهو 6131 ودى صورته



بعد عناء دام الخمس سنين
الحمد الله الواحد غير أهو يعنى تجديد
المهم
بعد مكا قبضت قلت س خلاص الواحد بقى يشد نفسه فى الشغل عشان نعوض اللى فات والحمد الله خير باذن الله آه الواحد تعب شوية بس إن شاء الله خير باذن الله
الشركة كانت عارضة عليا عرض انى أروح الفرع فى الإسكندرية طبعا انا فرحت اوى لانى كان نفسي أعيش فى الإسكندرية بس فى آخر لحظة قلت لا أنا كده كويس لأنى لأنى مش مهم
طالما أنا هنا أقدر أعمل حاجه كويسة يبقى تمام
أنا هبطت من الكتابة بس أنا مش ناسى حكايتى فى الإستدعى بس ربنا يسهل وأنا هكتبها دا فيه بلاوى والله
على فكرة أنا عيد ميلادى كمان كام يوم لما نشوف مين اللى فاكر
مع إن ولا مش مهم
لما نشوف
محدش قال مبروك يعنى مبروك على الموبايل

Saturday, November 10, 2007

مش عارف

أنا بكتب دلوقتى البوست ده قبل ما أسافر بكره رايح الجيش استدعى مش جيش جيش يعنى
المهم
أنا تعبان أوى وأعصابى زفت مش عارف ليه
المهم
الاستدعى ده جاى عليا عشان يعكنن علينا ولا ايه مش عارف
عادى بقى الحمد الله
انتو عارفين ايه المشكلة
ان احنا مش كفاية دخلنا الجيش لا لازم يطلعو عين اللى جابونا ويجيبو لينا استدعى كل سنه وساعات مرتين فى السنه
ليه مش معنى الناس اللى بتاخد تأجيل محدش بيعبرهم خااااااااااالص ليه أنا عايز حد يرد عليا
الاستدعى ده عمل معايا حاجات كتير
أولها انى لما لقيت شغل خلاص وبدأت فيه جه الاستدعى وسيبت الشغل ومش عارف هعمل ايه لما أخلص هرجع تانى ولا ايه
النهاردة جالى تليفون من مكتب سفريات انى ليا سفر السعودية مهندس انتاج حيوانى
طيب أروح ازاى بكرة والاستدعى بكره
:D
انا مش عارف انا بضحك ليه على حظى
ولا على حطنا كلنا عشان احنا فى مصر او بمعنى أصح تحت حكم موجود فى مصر
ربنا معانا كلنا
إدعولى
إدعولى

Wednesday, October 24, 2007

يا فرخة ما تمت آه والله فرخة

بمناسبة انفلونزا الطيور

أنا آسف انى لا بنزل ولا بدخل اى من البلوجات الصديقة

ولا بنزل بوستات جديده فى البلوج لانى بصراحى جبت آخرى

من كام يوم الحمد الله رجعت الشغل تانى فى شركة جديده وربنا فتحها عليا

ومن يومين كده جالى خبر نزل عليا كالصاعقة

دا أنا ملحقتش أفرح يا جدعان

هو فعلا المنحوس منحوس

يعنى منحوس ومحتاس فى نفس الوقت طيب ميكلوش على بعض خالص

المهم الخبر بقى يا شباب ويا شبات القرن

إن مصر حبيبتى الله يكرمها بلاش نشتم عشان حبايبنا

بتحبنى أوى أوى ومش عايزانى أبعد عنها قوم عملت ايه

جابت ليا إستدعى فى الجيش

شوفتو مصر بقى بتحبنى قد ايه

طبعا الشغلانة الجديدة راحت

و 21 يوم فى القرف تانى هيرجعو

قلولى أعمل ايه

أنا سلمت أمرى لله والحمد الله على كل شئ

بس أنا تعبت بجد

معتش قادر أكمل لوحدى عايز حاجة أسند عليها

تم بحمد الله

يا ريت محدش يجيب سيرة مصر قدامى

Friday, October 12, 2007

مش عارف


فى الأول بقولكم كل سنه وانتو طيبين
طبعا الكلام اللى انا هكتبه دلوقتى انا بكتبه عشان انا فعلا محتاج انى اكتبه
انا لما عملت المدونة دى عملتها عشان اكتب اللى جوايا سواء ان حد يقراه او مش يقراه كنت عايز اكتب وخلاص
انا عارف انى ممكن اضيع فرحة العيد عليكم بس انا عايز اكتب اللى جوايا
بعد سحور آخر يوم فى رمضان قررت انى اكتب حاجه عشان مش أتخنق
فيه ناس رمضان كل سنه بيفوت عليهم بالعزومات والأصدقاء والأصحاب و و و إلخ
أنا فى يوم من الايام كان نفسي ابقى واحد من الناس دى
من 4 سنين او اكتر عمرى فيهم ما اتعزمت عند حد بالعكس رمضان لما كان بيعدى عليا وانا فى الكلية كنت بفطر واتسحر لوحدى لانى كنت فى كلية فى غربة بلد تانية يعنى ولما خلصت دخلت الجيش وبرضة فطرت لوحدى وبعد ما خلصت الجيش اشتغلت فى المزرعة وبرضه رمضان كان بره البيت والأصدقاء ودلوقتى رمضان جوا البيت اللى هو السنه دى 29 يوم عدو عليا وانا فى البيت مش بخرج أو أحيانا بخرج للصلاه او أروح لواحد صاحبى أقعد عنده ساعه ولا حاجه وأرجع تانى حتى لما كنت بروح أصلى القيام او خلافة كنت ببقى لوحدى لما كنا بنخلص القيام كانو بيوزعو سحور انا حضرته مرة واحده لانى مقدرتش احضرة المرة التانية انتو عارفين ليه لانى كنت لوحدى تخيل نفسك قاعد فى مكان اللى هو الجامع وحوليك أكتر من حوالى 500 فرد وانت قاعد فى وسطيهم وبرضه حاسس بالوحدة وبتاكل لوحدك مقدرتش أكررها
فيه حاجات كتير اوى اوى مش قادر أقولها
نيجي بقى للعيد
كل سنه وانتو طيبين
تخيلو ان محدش قالى كل سنه وانت طيب الا أنوش اللى هى قطة الصحراء هى الوحيده اللى قالتها ليا
كنت متوقع ناس كتير اوى تقولها ليا لاكن اظاهر ان الواحد بيفكر فى الناس دى من طرف واحد انا عارف ان الدنيا تلاهى بس دى كلمه ممكن تسعد انسان
العيد أكيد ان شاء الله هيبقى فى البيت
اون لاين 24 ساعه فى العيد محدش يخاف
:D
حسيت بالوحدة بعد ما الدنيا خدت كل واحد لحياته
انا مش عايز افتكر أيام حبى الوحيد لما سابنى لوحدى فى وقت كنت محتاجه فيه اوى اوى اوى اوى
الحمد الله على كل شئ
انا قلت كلام كتير ملوش لازمة بس صدقونى انا استريحت
ويا ريت الكلام اللى قولته مش حد أصعب عليه او او لا
انا كتبت الكلام ده ليا انا وبس زى ما انا بحب دلوقتى
بحب ليا أنا وبس مش لشخصية نفسها
محدش يزعل منى
ومع انى مش بشوف حد فى البلوج عندى بقولكم
وحشتونى اوى

Monday, September 24, 2007

الجزأ الأول

بسم الله الرحمن الرحيم


ان شاء الله دى حكايتى او بمعنى أصح دى أصعب أيامى فى الجيش
طبعا مش هقدر أوصفها بالسوء اللى شوفته بس بتعب لما أفتكرها
وأنا قلت أكتبها عشان أقدر أواجهها ومش أتضايق لما أفتكرها وأقول إنى إتعلمت كتير منها
طبعا البوست فيه صور من جوجل إيرث للأماكن اللى هحكيها وبالتفصيل الممل جدا لول

هبدأ من أول يوم صعب مر عليا

دهشـــــــــور
لا ميه ولا نور

لو عايز تشوف الصورة كويس إضغط عليها وهى تكبر



فى الصورة اللى فوق ده كان المكان اللى كنت فيه فى دهشور وكانت أيام صعبه على رأى اللى قالو قبلنا دهشور لا ميه ولا نور أول ما دخلنا مش قدرنا نمسك نفسنا من ريحة الناس اللى كانت هناك مكنوش بيستحمو خالص ورحيتهم إستغفر الله العظيم بجد وفيه مكان النوم ومكان النوم ده كانت من العنابر القديمة فى مركز التدريب وكانت سيئة للغاية بس قدرنا نتكيف عليها ونعيش فيها وطبعا فيه سهم على الحمامات اللى كانت المية بتيجى 3 مرات فى اليوم وكل مرة ساعه واحده بس الساعه 7 الصبح والساعه 3 العصر والساعه 9 بليل وطبعا مكنش فيها نور بس كنا بنتصرف فى الميه والنور يعنى انا عن نفسي كنت متفق مع الواد اللى ماسك الحمام انى اعطيله سجارتين كل يوم ويعين ليا صفيحة ميه أستحمى بيها واليوم اللى مش أستحمى فيه منمش فيه وكانت مرة واحده بس طبعا كنا بنعمل المستحيل عشان الواحد بيستحمى بس الحمد الله اهى ايام وعدت شوفت العلاقة اللى كانت بين العساكر والصف ظباط طبعا المركز ده كان للناس ذات مؤهل الدبلومات واللى مش متعلمين خالص العلاقة اللى كانت بينهم بقى كانت جميل اوى اوى لما تكون ماشى وتشوف صف ظابط ماسك عسكرى وقاعد يضرب فيه ضرب باللإقلام والشلاليت والله كنت باكل فى نفسي لما شوفت المنظر ده وكل ده ليه عشان العسكرى لما كان بيلم الورق نسى ورقة فى الطريق ولا الصف ظابط اللى كان جايب اتنين عساكر ومصمم ان العسكريين يبوسو بعض بالقوة ولما واحد رفض تف عليه حته تفه دمى اتحرق ومنظر التفه على وش الواد بجد قلبى كان بيتقطع على الناس دى احنا فيه يا ناس بجد احنا فين مفيش رحمه خالص حرام والله حرام طيب قلنا ان صف الظباط اكتريتهم مش متعلمين لما تلاقى عسكرى بيموت ودخل العيادة والظابط الطبيب وكان كمان ظابط احتياط بيرمى العسكرى بره ويضربه بالشلوت فى بطنه والواد ميت على الأرض لا حول له ولا قوة الناس دى هتتحاسب إزاى انا عايز اعرف آآآآآآآآآآآه يا قلبى آه احنا عشان كنا مؤهلات عالية مكنش فيه حتى ظابط يقدر يتكلم معانا لا شتيمة ولا ضرب دى الحسنه الوحيدة اللى خدناها من التعليم وهى المعاملة الكويسه فى الجيش بس الناس التانية دى ذنبها ايه اكتريتهم مقدروش يكملو تعليم عشان الظروف خلاص تعبت ..... هنلاقى برضه سهم على الميس والميس للناس اللى مش عارفه يعنى ايه هو المطعم بتاعنا او مكان الأكل بتاعنا طبعا ساعت الغدى كنا أمم وكنا بنتعامل أحسن معاملة من أخوانا البعده صف الظباط يلا مش عايزين نتكلم عليهم المهم فى يوم من الايام قالو ان فيه فراخ أوبا فراخ يا واد انت وهو هنعيش بقى المهم فى اليوم ده أكلنا وظبطنا وكباية الشاى من الكانتين وكمان السجارة بعد الأكل وخلاص هننام خلاص نمنا بقى على الساعه اتنين كده خير يا رب لقيت هيصة جامده اوى صحتنى من النوم انا قلت بس فيه حاجه الحرب قامت او يبقى فيه عفاريت المهم بسأل قالولى مفيش حاجه قلت ماشى ونمت بعدها بشوية عرفت فيه ايه بس محدش قالى انا عرفت بنفسي لقيت بطنى بتوجعنى اوى اوى قمت واخد جركن الميه بتاعى ورايح الحمامات ببص وانا رايح ناحية الصحرا لقيت رؤوس سودة قلت متهيألى يا عم لاكن طلع العيال بتاعتنا المهم قلت يمكن قاعدين بيتكلمو ولا حاجه بس قلت الساع 2.30 يعنى المهم لما روحت الحمامات لقيت الحمامات مردومة ناس وانا مش قادر أمسك نفسي عايز أروح الحمام يا بشر وانا قاعد فى الحمام بقى لقيت واحد بيخبط يلا يا كابتن والنبى يلا يـــلا يــــــلا يـــــــــــــــلا يلا ومسمعتش حاجه بعدها قلت يبقى مات طلعت ببص لقيت بنطلون مرمى وبلاش قرف بقى اكتر من كده اتضح انه مقدرش يمسك نفسه بعيد عنكم الفراخ اللى كلناها طلعت بايظة وحالات الاشتباه فى تسمم كانت عند كل الناس اللى كانت فى المركز قعدت بقى آكل شاى ناشف ولمون و و و عشان يجيلى امساك بقى واعرف اتحكم فى نفسي والحمد الله اليوم عدى على خير مش هنسى اليوم ده المهم خلصنا المده بتاع العرض العسكرى وعملنا العرض قدام المشير طنطاوى فى أرض العرض العسكرى ويوم ما كنا ماشيين أكلنا لحمه ونفس الموقف حصل واحنا مترحلين على مركز التدريب الاساسى بتاعنا فى قويسنا اشتباه فى تسمم لان اللحمة كانت بايظة كنا ماشيين حوالى أكتر من 4 كيلو عشان نركب القطر فى الصحرا كان كل 200 متر نقعد نعمل زى الناس مش عايز حد يضحك كانت أيام ربنا ما يعودها كفاية بقى كده كانت الايام دى قبل رمضان علطول وأخدنا 10 ايام أجازة فى أول رمضان وبعدين هنرجع عشان نترحل على كل واحد فى وحدته وهحكى بقى الجزء اللى جاى حصل معايا إيه فى الترحيل المميت بجد

اللى خلت الأيام دى تعدى عليا بسرعه الصحبة الحلوة اللى كانت معايا

الجزء اللى جاى طريق الترحيل من قويسنا لغاية قيادة الجيش الثالث

Sunday, September 23, 2007

ترقبو البوست الجديد

هو بوست غريب شوية

فيه مواقف ليا صعبة مرت عليا فى رمضان

انا بكتبها مش عشان واحد يقول يا حرام وبتاع من ده لا

بس انا محتاج اكتبها عشان اواجهها

لانى كل ما افتكرها دمعتى بتبقى على طرف عينى

استنو بقى عشان انا بجمع لها صور حقيقية

Saturday, September 8, 2007

ممنوع الدخول لأقل من 8 سنين


أنا عارف انى إتأخرت كتير اوى اوى كمان بس كانت ظروف خارجة عنى ايرادتى وكمان فى ناس مش عايز اقول هم مين طهفونى بسبب تكملة القصة دى وكل شوية فين الباقى فين الباقى قلت عشان اخلس منهم بقى قلت اكملها وخلاص


احنا وصلنا لغاية فين فين فين آه لغاية ما روحنا نشوف العنبر يا ريت كده موسيقى تصويرية واضاءة خفيفة على المنظر

قلنا نروح نشوف فيه ايه فى العنبر وطبعا كلنا ماشيين على طراطيف صوابعنا والرعب ما سكنا من راسنا لرجلينا قمت انا بقى البطل بتاعهم مقرب من الباب وفاتحه براحه قال يعنى لو فيه عفريت ولا حاجه مش هيعرف المهم فتحت الباب ودخلنا وفتحنا النور وشوفنا حاجه محدش كان يتصورها انا محدش فى العنبر خالص لان كانو الصعايدة نزلو اجازة يوم بدرى عشان اللى بلده بعيده طبعا بعد الموقف ده كلنا وقفنا متنحين ومش عارفيفن نقول ايه عادى بقى المهم قفلنا العنبر بقى تانى وقلنا لو حد عدى وسلم علينا حتى والله ما احنا رادين خلاص انا سيبت الناس وروحت فى حته تانية عشان كان معاد تسليم النبتشية لزميل ليا وانا نايم طبعا كل الكلام ده فى الصحرا وانا نايم مع الناس بره فى الصحرا وخلاص روحت فى النوم قمت مخضوض حته خضة اقسم بالله العظيم اشد خضة فى حياتى صوت كلاب متوحشه والله وايه الصوت نفسه يرعب ما بالك منظر الكلام 3 كلاب جايين يتشاكلو جنب رجلى والله انا اول ما سمعت الصوت قمت منفوض من مكانى واقف مش عارف انا عملتها ازاى وطلعت اجرى وراهم مع العلم انى ساعتها كنت بكره الكلام موووت وبخاف منهم اوى حصل كتير وشوفنا كتير اوى فى دهشور

مواقف الترحيل

كنت انا مترحل فى رمضان كان ايام عذاب والله يوم الترحيل والواحد صايف يمشى فى الصحرا بالكام كيلو وهو شايل المخلة على كتفه كنا بنموت فعلا فعلا مفيش مواقف مرعبة حصلتلى فى الترحيل الا موقف واحد بس فى الفرقة قبل ما اروح اللواء بتاعى اول ما وصلنا الفرقة فى السويس كان النور قاطع وفضل قاطع مدة طويلة المهم لقيتهم بينادو على الأسامى واختارو 10 بس وانا كنت منهم قالو دول اللى هيبقة فى الميس والميس يعنى المكان اللى بناكل فيه المطعم والمطبخ وكده يعنى قلت بقى اشطة دا انا هعيش ولا ريتنى ما قلت قشطة طلع عسل أسود بعيد عنكم حد شاف اى فيلم للعبيد او اى حاجه من دى احنا كنا كده كنا احنا العشرة متبهدلين جدا اللى كان بيغسل الصوانى واللى كان بيقطع مش عارف ايه للغدى واللى كان بيمسح اما انا بقى كط
نت بعمل الحاجه الوحيده اللى فعلا ساعتها صعبت عليا نفسي اوى اوى بس قلت عادى خالص ياما هنشوف كنت بنزح الطرنش هتقولو يعنى ايه طرنش اقولكم الجيش مش فيه مجارى اوكى فا كل المية المستعملة او المجارى بمعنى اصح بتبقى فى حفرة كبيرة وبعدين عربية الشفط بتيجي كل مده تشفطها وكان ياعتها المطبخ الطرنش بتاعه مسدود وميت اللى هيفضى الطرنش العبد لله كانت بجيب صفايح الجبنه وآخد من الطرنش وارمى فى الشارع انا ساعتها كنت بدعى ان ربنا ياخدنى من اللى انا شوفته كنا فى رمضان وقعدنا نشتغل من الساعه 10 لغاية الساعه 2 بليل وبعدين قالو روحو نامو وتعالى الصبح الساعه 6 طبعا قبل ما ننام كل واحد اخد ربع فرخة بقى ونظام بس مين اللى ليه نفس والله كل واحد مقدرش ياكل حاجه ورمناها للكلاب المهم تانى يوم بقى صحينا ورضينا بالأمر الواقع خلاص احنا هنموت هنا ومرة واحده لقيناهم بينادو علينا عشان نمشى بدوزن تفاصيل واحنا ماشيين شوفنا منظر غريب اوى واحد راكبه جن تو عفريت عسكرى من اللى كانو فى الفرقة مش عارف بقى المهم الواد زى ما يكون عنده صرع او حاجه وعنيه بترمش بطريقة غريب وسريعه اوى اوى اوى واحد بيقولى اتشاهد فى ودانه قلت له اعمل ايه يا عم ما تعمل انت انا ساعتها كنت مرعوب طبعا انا مالى انا مش بحب الحاجات دى وسيبته ومشيت طبعا بقى ما ادراك من الاشاعات فى الجيش اللى يقول دا كان بيعمل زى الناس وشاف قطه قام عامل عليها قامت القطة نطت عليه ودخلت جوا بطنه لانها كانت من الجن واللى يقول ان الحمامات دى مات فيها واحد وعشان كده محدش بيخشها بليل

كلام كتييير اوى فى الموضوع ده


فى مرة كنا فى مشروع فى سينا فى ابو رديس لو حد عارفها بس كنا جوا فى الصحرا وكنت ساعتها برضه بخاف من الكلاب اوى فكانت الكلاب بتمشى من حوالينا واحنا نايمين على الأرض فانا كنت بتلكفت بالبطانية عليا عشان لو اى كلب قرب مش يشوفنى يعنى او اى عقرب او تعبان مش يقرصنى وطبعا انا مش جايلى نوم من الرعب اللى كان فى قلبى كنت مرعوب اوى اوى ومرة واحده لقيت صوت زميل لينا بيصوت ويجرى قلت بس الكلب عضه ولا حاجه ببص عليه لفقيته بيجرى زى المجنون فى من حوالينا صدقونى موقف صعب اوى اوى جيت اقرب منه قمت واخد ضربه تمام نيمتنى فى الارض قمت ومسكته وهدناه وبعد كده قلنا له فيه ايه يا ابنى فقال انه كان بيحلم بالتعابين والعقارب وفيعه تعبان قرصه فى رجليه قلت الله يحرقك حرقت دمنا طبعا اليوم ده مفيش فيه اى نوم
مواقف ليا حصلت بقى وانا كنت فى مشاريع فى حته اسمها مش فاكر والله الجفرة تقريبا حاجه زى كده دى كانت قريبه اوى من العاشر من رمضان وكنا بنبقى فى نص الصحرا يعنى بنمشى حوالى ساعه فى الصحرا لغاية ما نوصل صدقونى لما كنا بنام فى الصحرا وبنسمع صوت الديابة والحاجات دى اقسم بالله انا كنت بموووت انا اكتر حاجه بخاف منها الحيوانات دى بس قلت عادى الرب واحد والعمر واحد واقوم نايم والله من كتر خلاص فقدان الامل فى اى حاجه احنا كنا بنام جنب جحور التعابين والعقارب ولا فى الدماغ عادى بقى هنموت يلا خير هنعيش يلا خير برضه كانت ايام

ولا حته موقف بقى

كنا بنعمل خريطة لسينا على الأرض بالاسفنج وقعدنا نعمل فيها لغاية الساعه 2 بليل وروحنا نمنا الصبح الساعه 6 الصبح تخيلو لقيت ايه والله انا ساعتها قلت بس احنا انتهينا ببص على الخريط لقيت ....... انا هبط بعدين اكمل بقى

Friday, August 31, 2007

يرجى عدم الدخول لأقل من خمس سنوات



يااااااه من زمان مكتبتش قصدى من زمان مدخلتش البلوج مش عارف ليه
يمكن عشان كنت مخنوق من الكمبيوتر كله ولا ايه المهم نخش فى الموضوع كده دغرى عشان محدش يتخنق لان الموضوع شكلة طويل

الأفلام الرعب فى حياتى

زمان والواحد صغير كان بيخاف من العفاريت وكل شوية وانا فى ابتدائى وانا قاعد مع أصحابى كنا بنقعد نحكى عن العفاريت واللى يقلف قصه من دماغه بقى ما هو محدش شاف العفريت ولا اى حاجه المهم وانا فى سنه 2 ابتدائى كان ليا واحد صاحبى خيالى قوى يعنى شوية يقول انا امبارح شوفت قطة براسين وبعديت اتقسمت نصين طبعا ساعتها كان لازم كلنا نصدق فعلا اللى حصل المهم طبعا انا عارف ان مفيش حاجه اسمها عفاريت ما عفريت الا الانسان انا مقتنع بالجن ان فيه جن مش عفريت آه ساعات بسمع ان اسم العفريت درجة من درجات الجن بس ربنا يبعدنا عنهم ويبعدهم عننا قبل ما أخش الجيش كنت ساعات بسمع أخبار عن العفاريت دى ويقولك دى صورة العفريت فى مجله خليجية وحكايات وحاجات من دى بس انا فيا حاجه ماشى عليها فى حياتى وهى متصدقش اللى تسمعه وصدق نص اللى تشوفو وانا هحكى اللى شوفتو
دخلت الجيش فى شهر 7 سنه 2005 طبعا قضيت الجيش عادى خالص

أول 3 شهور
كنت لسه فى مركز التدريب وفى ليلة كنت سهران انا وناس زمايلى حوالى كنا 4 وكان تانى يوم هنترحل لدهشور عشان كنا فى العرض العسكرى كنا بنسمع ان دهشور دى مفيش قبلها ولا بعدها يعنى ام الرعب فى الوطن العربى المهم قضناها حكايات رعب واللى يقول مش عارف كان فيه عفريته عندنا فى البلد وكانت بتاكل الناس و و و و حكايات كتير طبعا انا رايح انام الساعه 1 كدهوقلبى بينى وبينك مليان رعب العنبر كبير ومفيش اى مجال ان الواحد يستخبى :) قبل ما انام واحد صاحبنا راح الحمام عشان يشرب وبعدين لقيناه جاى بيجري الحقو الحقو قلت ايه يا ابنى عفريت قالى لا اسخم ايه فيه ايه قالى ان الحمام مليان دم قلت بس يبقى فيه عفريت أكل واحد ولا حاجة المهم روحنا فعلا والرعب بيدب فى قلب كل واحد منا ولقينا الحمام مليان دم المهم نمت عادى ولما روحت فى النوم ومرة واحده سمعت ضرب وناس بتتكلم بصوت عالى حرس سلالالالالالالاح امسك يا ابنى اجرى يا ابنى انا ساعتها قلبى وقع واتنفضت من على السرير مع ان باقى العنبر ولا حد سمع حاجه ولا قام المهم قلت يبقى فيه كلب دخل على عنبر حد وأكله كل حاجة بقى ساعتها كانت جايزة المهم روحت نمت تانى وانا مش عارف فيه ايه
ايه اللى حصل بقى
واحد كان معانا فى المجموعه بتاعتنا كان بيضرب برشام كتير فضربت فى دماغه انه يقطع نفسه بالموس وده كان سبب وجود الدم فى الحمام وفضل يجرى عايز ينط من على السور عشان كده العساكر الحراس جرت وراه لغاية ما مسكوه المشكلة مش فى كده المشكلة ان الواد ده بيجرى والدم بينزل منه بطريقة غريبة جدا المهم اتمسك ووادوه المسشفى وتانى يوم شوفنا كمية الدم اللى نزلت من الواد ودى آخرة اللى ميسمعش كلمة ماما تقولها أخد كمية كبيرة من البرشام اللى خليته كده روحنا دهشور كانت فى الصحراء الجرداء دهشور لا ميه ولا نور كانت فى مكان محدوف كده فى وسط الصحرا محدش عارف لها سكة المهم وصلنا مش اقولكم اننا كنا بنام فى مكان الكلب يقرف ينام فيه مليان فيران عملاقة وحشرات و و و المهم عادى بقى أخدنا عليها الله يحرقهم كنا فى آخر الجبل وكان الخوف من الكلاب لانى بخاف جدا جدا من الكلاب قاعدين بليل ولا بينا ولا علينا واحد فتح فى موضوع العفاريت تانى قلت بس احنا دلوقتى فى بيت العفريت نفسه يعنى هيجيبنا هيجيبنا متتصوروش ان كان فيه جامع بيأذن لوحده وفى اوقات مختلفه عن الصلاة كان فيه مكان محدش يقدر يهوب ناحيته عشان معروف ان فيه حاجات غريبة هناك وشوفو القصة دى كده كان واحد رايح يعمل زى الناس فى الصحرا ورا بعيد المهم وهو قاعد زى الناس بيبص جنبه لقى واحد قاعد جنبه بيسأله انت هنا من امتى قاله انا هنا من 73 ههههههه تخيل لو الموقف ده حصل معاك تانى موقف كان فيه بدو جنبنا وكده قالك فى يوم من الايان عسكرى اغتصب بنت من البدو فاهلها عرفو فدخلو على العنبر بتاع العساكر وموت كل اللى فيه وحظ الواد اللى عمل الحركة دى كان فى اجازة والباقى كله مات العنبر ده موجود لغاية دلوقتى وحقيقة بجد ومحدش يقدر يدخلو بليل ابدا بجد

موقف تانى

كنت انا وزمايلي ليا قاعدين بنحرس العنابر بتاعتنا بليل المهم كل شوية العنبر بتاع الصعايدة النور يولع وينطفى قلنا عادى اكيد واحد منهم بيقوم يولعه ويقفله شوية نلاقى واحد معدى من آخر الطريق ويدخل العنبر ده قلنا عادى اتكررت كذا مرة المهم قلنا نروح نشوف ايه مش هتصدقو اللى احنا شوفناه انا هعيط بجد كل ما افتكر اللى شوفته نخليها البوست اللى بعده بقى لانى مش قادر اكمل

Tuesday, August 14, 2007

الزمن لاطشه - قفاه حرقه بجاز 2


طبعا انا اتأخرت كتير اوى انا عارف بس كانت ظروف والحمد الله اهى بتعدى المهم نكمل بقى الحكاية
ومرة واحدة
الراجل وقف فى الطريق قلت بس العربية دى كمان عطلتبس الحمد الله طلع وقف استراحة قصيرة يعنى
نزلنا قعدنا خمس دقايق اللى عايز يشرب والى عايز كده يعنى يعنى اتصرفنا رجعنا العربية تانى وقعدت بقى أسمع فى شوية أغانى حزينه بما انى راجل مكتئب بقى الشريط بتاع هشام عباس والكام اغنية الحزينه اللى فيه لغاية ما وصلت البت والحمد الله ربنا عداها على خير المهم اتصلت بالمدير بتاعى اللى كان فى المزرعة اللى انا كنت فيها وقلت له انى عايز شغل قالى الاسبوع الجاى ان شاء الله ابقى اتصل بيا وربنا يسهل اهو فيه مزرعة بمرتب 1000 جنيه لو جيت بصراحة مش هفكر انى أسافر بره دلوقتى ربنا يسهل بقى

نيجى للموقف التانى اللى انا مستغرب عشانه وهو

يوم السبت اللى فات اللى كان يوم 11/8/2007
لقيت واحد صاحبى بيتصل بيا الصبح وبيقولى تعالى دلوقتى مستشفى المنصورة الدولى عشان أمه هتعمل عملية
طيب خير حاجه حصلت قالى لا اللى هيدخل يعمل عملية لازم يتبرع بكسين دم قلت ايه الهبل ده طيب واللى مش عنده حد يتبرع بالدم مش هيعمل العملية ولا ايه المهم قمت وخدت الدش الجامد ولبست ونزلت ورحت له وانا رايح قلت طيب انا عندي بروسيلا طيب والحل ايه ممكن حد ياخد الدم بتاعى ويجيله بروسيلا المهم دخلت بنك الدم وقعدت وبدأو يركبو الجهاز بتاع الدم ده قلتله يا دكتور انا كذا وكذا قالى مش مهم المهم الفيروسات المعدية قلت له انا الحمد الله كويس اتكل على الله فضلت قاعد وأنا شايف دمى بنزل كان شكله حلو اوى المهم قعدت حوالى 10 دقايق لغاية ما الكيس اتملى وخلصت ورحت مع صاحبى عشان يدخل والدته عشان العملية المهم دخلناها ومشيت روحت
قعدت افكر فى النظام الغريب بتاع لازم كسين دم ده مش عارف طيب الناس اللى مش عارف تجيب حد تعمل ايه انا بصراحة مش عاجبنى النظام ده ما كل مستشفى بيجيلو تبرعات دم كتير لازم يعنى الحكاية دى دا الواحد بيفكر يشتغل آخر الليل مصاص دماء واعمل هجوم على المستشفى دى وأخلص كل الدم اللى جواه
جه فى دماغى صورة الناس اللى بتبيع دمهم عشان الجنيه لانهم مش لاقيين يكلو
انا مش عايز افتح فى الموضوع ده دلوقتى بس قريب باذن الله

أنا حاسس ان القصة اللى بحكيها دى غبية اوى مش عارف ليه حاسس انها ملهاش طعم زى اى قصه كنت بكتبها بس اعمل ايه يلا مش مهم استحملونى شوية
باذن الله بكره او بعده بالكتير هكتب بقى حاجات ومواقف حصلت ليا محدش يعرفها الا انا وبس منها مواقف رعب بجد ومنها مواقف بشوفها قدامى ومش بتعجبنى إستنو انتو لسه شوفتو حاجه

Friday, August 10, 2007

الزمن لاطشه - قفاه حرقه بجاز


الدنيا دى فيها كام بلياتشو الزمن لطشو

قفاه حرقة بجاز الزمن وعده قام سدقهتشو

واهى ضربت شقلباظ


طبعا فى البداية انتو عارفين ان انا بقول كل حاجه بالتفصيل فى اى حكاية انا بحكيها ممكن تكون عيب فيا بس انا شايف انها ممتعه اوى وبتدى للقصه اللى الواحد بيحكيها طعم ان الواحد يكملها

المهم

هنيجي ليوم الاربع اللى فات اللى كان يوم 8/8/2007 كان عندى مقابلة فى القاهرة لشغل بره فى السعودية وبالتحديد فى الرياض

جالى تليفون يوم التلات

هو : انت مطلوب بكره عندنا فى المكتب عشان مقابله

أنا : انتاج حيوانى

هو : بتقول ايه يا استاذ

أنا : بقولك قسم انتاج حيوانى

هو : أيوا

كان فاكر انى بشتمه قعدت أضحك بعد التليفون ده ضحك المهم قلت أروح ولا لآ أروح ولا لآ المهم قررت انى اروح فعشان كده كنت طلبت منكم انكو تدعولى بان ربنا يوفقنى فى المشوار ده لانى عايز أغور من البلد دى بصراحة بس اظاهر كنتو بتدعو عليا مش ليا :) المهم سافرت الصبح ووصلت القاهرة الساعه 12 الظهر وكان معادى الساعه 1 الظهر وانا أصلا معرفش القاهرة اوى قلت لما اوصل ابقى أسأل اى حد أروح المهندسين ازاى وهو هيقولى المهم نزلت فى عبود ام الميكروبصات سألت سواق من البحيرة قلت له اروح منين المهندسين قعد يتكلم كلام كتير وانا اقوله ايوا آه أيوا آه ولا انا فاهم حاجه سيبته ومشيت بعد شوية رجعت له تانى قلتله طيب اروح من طريق تانى اكنى عارف مصر يا اخويا المهم كنت حاسس ان الراجل هيحدفنى تحت اول عربية المهم ركبت المترو من الزراعة ونزلت محمد نجيب وده كان أسهل طريق على ما قالولى يعنى المهم قعدت أستنى فى محمد نجيب ربع ساعه عشان اركب اتوبيس 194 اللى رايح المهندسين ركبته ويا رتنى ما ركبته وصل تقريبا فى ساعه الا ربع مع ما طلع روحى المهم المكتب اتصل بيا تانى وانا فى الاتوبيس قلت بس دى الشغلانة دى ليا انا وبس وصت المكتب قعدت ربع ساعه وعملت المقابلة

أنا : السلام عليكم

الراجل : وعليكم السلام

أنا : قعدت ساكت

الراجل : انت انتاج حيوانى

أنا :فى فرح أيوا انتاج حيوانى

الراجل : طيب تعرف فى مكافحة الحشرات

أنا : فى سرى يا ابن ال .... ما انا كنت جاى المرة اللى فاتت عشان كده .. لا معرفش

الراجل : يعنى متعرفش اى حاجه فيها

أنا : حضرتك بص فى الورق كويس انا اعرف انتاج حيوانى بس وانا كنت بولع نار

الراجل : طيب المهم دى العقد

مبلغ 1000 ريال فى الشهر , 8 ساعات فى اليوم , السكن عليهم والأكل عليك , العقد سنتين

قلت ايه

أنا : لا مينفعش

الراجل : طيب فكر

أنا : لا حضرتك انا انتاج حيوانى


سيبته ومشيت وانا ماشى راسى هتفرقع من كتر التفكير اتصلت بصديقة ليا انا بحب آخد رأيها فى أى حاجه بس للأسف مكنتش بترد عليا وقتها احترت دخلت صليت الظهر وقلت اللى يجيبه ربنا خير صليت وركبت رمسيس علطول وقلت اروح وخير ان شاء الله

العربية كانت ناقصة واحد بس اللى هو انا ركبت ومشينا علطول لسه طالعين من القاهرة العربية اتعطلت قلت بس اهى كملت

ويا حسرتاه كنت قاعد فى البيت والواحد ابيض شوية وقفت نص ساعه فى الشمس اسوديت اكتر المهم كان معانا اتنين ستات تقريبا من شبرا قاعدين وعلى الضحك اللى ضحكته عربية تانية جيت وركبنا فيها الواد ابنهم قاعد جنبى ورا والاتنين الستات قدامى الواد قاعد يجيب قرص منين مش عراف وياكل ويوقع عليا اقوم باصص ليه بصه الواد يخاف ويبطل اكل والست اللى قدامى تقريبا كان مليانه نمل وكل شوية النملة فى قفايا النملة مش عارف ايه فى الوقت ده كنت بسمع على التليفون أغنية قفاه حرقة بجاز كنت عايز اقولها ممكن نجيب شوية جاز ونولع فى قفاكى

وبعديها بقى قمت مشغل اغنيه أنا النملة بوكى

يا خرابى على الضحك اللى ضحكته

ومرة واحده :O

Saturday, July 28, 2007

التاج وأول تاج ليا


الله يسامح اللى كان السبب


التاج ده متمرر ليا من الصديقة دعاء




وربنا يسهل ونقدر نجاوب عليه


نبدأ




انت مين ؟




إسمى محمد العشرى


مهندس زراعى كنت شغال فى مزرعة بقر بتاع بقر يعنى


عندى 24 سنه وبدور على عروسه :)




مين أكتر ست أشخاص بتحبهم ؟؟؟




والله أنا بحب كل الناس وعمرى ما كرهت حد فى حياتى


بس اللى بحبهم والدى ووالدتى وأخواتى وأى بنت صغنونة


أصل انا بحب البنات الصغنونة اوى




هل أنت سعيد ؟؟؟




أكيد الحمد الله أنا سعيد


لكن هبقى أسعد لو حلمى إتحقق وألاقى البنت اللى أقدر أحبها أكتر من نفسي




لو إجتمعت مع حسنى مبارك فى مكان واحد هتعمل إيه ؟؟؟




سؤال محرج جدا وبما إنى مليش فى السياسة هقولة والنبى يا حاج معكش اتنين جنيه سلف


وهو يفهمها بقى ونشوف هيعمل إيه




لو معايا مليون ونص أعمل إيه ؟؟؟




آه ه ه ه جينا بقى للسؤال الحدق


أولا نص مليون هعمل بيه مشروع زى مشروع صناع الحياه كده والدخل بتاعه هيبقى للناس المحتاجين بس


أما المليون التانى فهفتح بيه مزرعة بقر صغيرة




بتحب مصر ؟؟؟




مصر ... مصر


أنا متهيألى سمعت الكلمة دى قبل كده


حكم اللى يخش الجيش بيسمع كتييييير




مين أكتر شخصية متقدرش تستغنى عنها ؟؟؟




والله كان زمان فيه ناس كتير مقدرش أستغنى عنهم أبداً لكن فيه حاجه فى حياتنا إسمها الفراق ودى بجد أصعب حاجه قابلتنى وإفترقنا أما حاليا فمفيش شخص معين عادى بالنسبة ليا يعنى




إيه أكتر موقف محرج ؟؟؟؟؟




ههههههههههههههه


هههههههههههههه


كان من حوالى سنتين ونص كنت ماشى أنا والإنسانة اللى كنت بحبها فى الشارع ولقيت شوية عيال صغيرة ماشيين ورانا وفجأة طلعلى واحد وبيقول للعيال آه والله هو والله هو ده اللى كان ماشى مع فايزة إمبارح قلت له فايزة مين يا ابنى يلا إجرى آلاقى العيال اللى معاه يقولو آه هو والله هو ده اللى كان ماشى مع فايزة إمبارح قمت باصص ليها وقلت لها أوعى تصدقى انا أصلا مش من هنا والحمد الله انا فعلا مكنتش من البلد دى والموقف عدى على خير بس كنت حاسس ان الناس هتتلم عليا وتقولى فين فايزة لغاية دلوقتى بسأل نفسي هى مين فايزة دى




الأمنية اللى أنا أتمنى تحقيقها ؟؟؟؟




إنى اسافر بره مصر وأشتغل وأكون نفسي ,اتجوز الإنسانه اللى تستحقنى




التاج بقى يتمرر لمين ؟؟؟




نيهاهاهاهاهاهاها


جالك الموت يا تارك الصلاه


أنا بقى ليا مزاج أمرره لناس كتير منهم


Nony


Shahram


Shahy


Doba


Ro7


كان نفسي بقيت الناس بس ملحوقة محدش يقلق نيهاهاهاهاهاها


Friday, July 20, 2007

موضوع مهم جدا بايوجيومترى

طبعا أنا متأكد انكم مستغربين انى اكتب موضوع زى ده بصراحة انا مليش فى الحاجات العلمية أوى دى بس امبارح وانا فى المدونة بتاع صديقتنا هبه (دوبا) قريت لها بوست عن إنها لما بتقف قدام البحر بتحس براحة نفسية كبيرة اوى ساعتها قعدت أفكر ليه هى لما بتقف على البحر او اى انسان لما بيقف على البحر بيرتاح نفسيا . موضوع مهم برضه انا عايز اعرف ليه مش معنى البحر رجعت كده فلاش باك لليوم اللى قبله وانا قاعد مع أصحابى سمعت كلمة غريبة قالها واحد صاحبى وهى البايوجيومترى قلت اوبا بقى هنخش فى مواضيع كلام فى كلام وانا بصدع بس الكلمة لقتنى بفكر فيها كتير مش عارف إيه اللى شدنى ليها رجعت البيت ولا فى دماغى ولما قريت الموضوع بتاع هبه جيت الكلمة فى دماغى تانى لانها كانت بتتكلم عن الحالة النفسية للإنسان . بعد ما قريت البوست بتاع هبه عملت بحث عن الكلمة دى ووقعت على موقع مصرى بتاع دكتور مصرى إسمه د/ إبراهيم كريم دخلت على الموقع وانا مش فاهم اى حاجه قعدت اقرى وانا برضه مش فاهم حاجه قلت لا أركز شوية بقى عشان نفهم قعد اقرى وأقرى وأقرى إستغربت كتير ومش عارف اصدق فعلا الكلام ده ولا لآ بس فيه حاجات واقعية كتير اوى المهم نخش فى الموضوع الكلام اللى انا فهمته من الموقع هو

إن جسم الإنسان يكون حوليه موجات غير مرئية لما بيقابل موجات تانية بتكون اقوى منه فى الطاقة هى اللى بتأثر فيه يعنى الواحد لما بيغسل وشه بشوية ميه بتحس بايه انك احسن من الأول ولما بتستحمي بتحس بأحسن أهى هى حاجة زى كده بقى اللى بتحس بيها لما بتقف على البحر لما بتدخل تصلى فى الجامع لما بتشوف منظر جميل لما بتسمع موسيقى جميلة طبعا مش كل الحاجات دى بسبب الموجات وبس لا انا مش عارف أوصلهالكم ازاى بس أنا بشرحها بطريقة أسهل من الموقع خش الموقع وانت تعرف هى ايه السبب فى راحه البال والحالة النفسية لما بتقف على البحر فيه حاجات كتير اوى زى الرنين والبصمات الحيوية والراديستيزيا حاجات كتير اوى .خش وانت هتعرف
أنا سامع ناس بتدعى عليا انى فتحت فى موضوع ملوش آخر بس أعمل إيه رخامه بقى مش إسمى عبده محتاس فأنا محتاس دلوقتى
هو ده الموقع اللى بقولكم عليه

Thursday, July 12, 2007

هل جاء ملك الموت ؟



دي ممكن تكون أول مرة أكتب وأول مرة أحس الإحساس ده اللى انا مش عارف أوصفه يا ريت تقولو رأيكم فيها يا ريت :)

خلف أسوار الليالي العالية وفى أحضان الظلام الدامس هنا . وهنا فقط استريح استعيد حكاياتي القديمة التى ولت وأعيش فيها حتي النخاع

ينمو عمرى ويزدهر امامي ويصير يافعا ويموت عند الصباح . يسوقنى لهيب الشمس ويجلدنى بسوط غليظ لأدور فى الطرقات أبحث عن سنوات عمري التى تسربت وأغرقت فى أعماق المحيط . ينزف جرحي العميق وتتجمع الشمس فى بوتقه تقف على جرحي . تغرس سكاكين أشعتها فيه . عندما يشتعل تقودني قدماى إلي ظل شجرة مثمرة فتتساقط ثمرها على الجرح لأعود أصرخ من الألم ويتوالى السقوط

آخر تجربة لى منذ شهور عديده لا أحصيها كانت مع فتاه عادية وبرغم قله جمالها روت يدي الممدودة إليها . وتساءلت كيف افلت من ملك الموت إلي هذا الحين ؟

كنت وأنا أتحادث معها اتفادي وقع عيني علي عينيها حتي لا اذدرد ما بجوفى من شده جفائها . أنا الذى كانت ممالك الجمال تأتمر بإشارة من إصبعي تكون هذه نهايتي . كانوا يتصارعون من أجلي وانا أستلقي على سرير يبطنه الحرير تغلفه زهور الياسمين وتمتد أيديهم بكؤوس من العسل فاحار أى كأس أختار . أشرب وأشرب حتى أرتوى . أتجول فى طرقات القصور ومن شرفاتها أري الحدائق المزدانه بأجمال أنواع النباتات والزهور

يقذفنى ويفزعنى ان أبصر وسط كل هذا الجمال شجرة جرداء يعتليها غراب اسود عجوز فأحاول أن أدير عيني عن المنظر المشوه تدور الشجرة بغرابها معي فى كل اتجاه
يضيق صدري وأختنق ويصاب رأسي بالدوار . تنخلع الشجرة من مكانها وتنتقل لتقف أمامي أنظر إلي الغراب ... تتلاقى عينانا وتتوحد فتنهار القصور وتحترق الحدائق وعلى أطلالها يعلو نعيب الغراب . توقد الشمس ثانيا . أتقلب على جمرها وتجئ رفيقتى تحمل فى يدها حزمة من ( الشوك ) وتناديني بصوت شبيه بحفيف أشجار الصفصاف المرعب . أسالها وأنا أضع يدي على عيني . هل جاء ملك الموت ؟ ؟ ؟ ؟

Wednesday, July 4, 2007

الإدمــــان




الموضوع ده جه فى دماغى بعد ما شوفت ليله صعبة اوى عليا امبارح .. موضوع مهم جدا لينا كلنا سواء بنت او ولد انا هحكيلكم القصة اللى حصلتلى امبارح وعايز اعرف مين السبب ؟
كنت قاعد اتفرج على فلم رعب امبارح بعد ما صليت الفجر لقيت الباب بيخبط الساعه 5 الفجر استغربت قلت يا رب خير
جارتى : تعالى تعالى بسرعه
أنا : متسمر على الباب طيب فيه ايه الأول
جارتى : تعالى بس بسرعه وطلعت تجرى
أنا (فى سرى) هى الوليه دى هبلة ولا ايه قمت رايح جارى وراها وكنت لابس شورت وفانلة قط .
ببص لقيت البيت عندها متكسر وبلاوى زرقها وواحد بيخطرف جوا على السرير أنا قلت انه حرامى وضربته بالسكين وبيموت كنت هجري بس ببص لقيته جوزها
أنا : هو ماله ؟
جارتى : أصل كان بيشرب مخدرات ( أنا كنت عارف من زمان كده يعنى ) وبعدين هو بيتعالج دلوقتى وبياخد دواء مهدئ للأعصاب
أنا : طيب سبينى معاه
بصراحة انا كنت خايف فى الأول انه يضرب او يعمل اى حاجه طبعا لانه مش فى وعيه ابدا بس ببص لقيته يا حول له ولا قوة رفيع جدا وخاسس مش ده الراجل بتاع زمان المخدرات بهدلته خالص فضلت قاعد معاه انا وابنه عشان لما بيقوم من على السرير بيقع وبيتخبط دا راسه كانت مفتوحة من الخبط قعدت معاه انه ينام ابدا طيب وبعدين يا عمونا نام بقى وارتاح وريحنا ابدا كل شوية ينام على السرير ويقوم تانى يطوح مش عارف ينام خالص حصل بقى شوية مفاجآت منها
هو : هى فين ؟
أنا : هى إيه ؟
هو : الطمطماية اللى كانت هنا
أنا : آه انا اخدتها وكلتها
هو : طيب
وبعدين ينام ويقوم صاحى ويعمل حاجات غريبة كده مكنتش وقتها عارف اضحك ولا اعيط
هو : هى فين ؟
أنا : هى ايه تانى ؟
هو : كباية الشاى
انا : اه انا بعملها على النار اهو
شوية كده .... وبعدين لقيته قايم فرايح اسنده وعلى غفلة ومش واخد بالى لقيت طخخخخخخ لغاية دلوقتى ايديه معلمة على وشى حته قلم ودانى صفرت علطول قلتله معلش قمت ماسكة ومنيمه تانى طلعت من الأودة ومش عارف اضحك ولا اعيط ... شوية دخلت تانى
هو : نتسنايسنتامنتلسرلاق .
أنا : آه عارف
هو : طيب منتاسنتنتلاربت هناك
أنا : يا راجل
طبعا كل ده وانا قاعد خايف ياخدنى على خوانه تانى
المهم قعدت معاه لغاية ما نام على الساعه 10.30 كده قلت الحمد الله انا هروح انام بقى ولو فيه اى حاجه انا موجود ابعتيلى
انتو عارفين حكاية الراجل ده ايه .... زمان كان واخد قرض من البنك وكان بيتاجر فى العربيات وتقريبا خسر حاجه زى كده تخيلو لغاية دلوقتى بيدفع فى القرض بقالة اكتر من 5 سنين يعنى دفع القرض ييجى ستين مرة وده اللى خلاه يروح لطريق البانجو والقرف عشان ينسى ليه حق اهو متجوز وعنده 3 ولاد الكبير فى تانية ثانويى والصغير مكملش سنه لسه بجد انا مش عارف اقول ايه بس اللى عايز اعرف السبب مين ؟ مين السبب فى كل اللى بيحصله ده ؟
يا رب اهديه واهدى كل المؤمنين يا رب وارحمنا
أهو ده آخرة الإدمان ربنا يبعدنا عنه آمين
:'(

Tuesday, June 26, 2007

للكبار فقط




هتكلم النهاردة على موضوع يهتبر من أخطر المواضيع اللى ممكن الواحد يشوفها الايام دى
الموضوع ده هو منتجات الالبان واللحوم فى مصر سواء جبنه - لبن - زبادى - لانشون ... إلخ .
طبعا انا مسمى البلوج بتاعى قصة حياتى والموضوع ده كان فى حياتى وكنت عايش جواه .
نبدا بالألبان :
بما انى شغال فى مزرعة منتجة للألبان بكميات هائلة أحب أوضح إيه مدي الخطر فى الموضوع بتاعنا النهاردة .
فيه خطر كبير اوى اوى علينا كلنا وعدم صلاحية كمية كبية من الألبان فى الصناعات الغذائية أنا مش هذكر أسامي شركات ولا اسامي أشخاص المهم فيه بعض الشركات بتاخد اللبن البايظ او الحامض اللى مليان ميكروبات وبكتريا كل ده ليه عشان التمن يعنى لو اللبن مش بينفع ينزلو فى التمن وكده الشركة بتكون كسبانه انها أخدت اللبن بتمن أقل وبنفس الكمية تانى حاجه زمان كنا بنسمع عن اللبن المصنوع اللى هو معمول من بودرة السراميك وده بيتعمل عن طريق كمية من بودرة السراميك مع مياه مع بعض المواد المكسبة للطعم واللون يعنى مفيش اى حاجه من اللبن فيه ويتباع على أكنه لبن طبيعى هتقولو طيب ما الشركة بتعمنل تحاليل اقول لكم ان فيه بعض المواد اللى بتضاف وكلها كيماويات بتدى نفس الخصائص . ثالثا بعض معامل الالبان بتجمع اللبن من الفلاحين وما أدراك ما لبن الفلاحين كله ميكروبات وجله وذباب يعنى مش هنحلص وبيتجمع اللبن ده ولو فيه لبن بايظ يتحط عليه ويتضاف بعض المواد الكيميائية اللى بتعادل الحموضه فى اللبن عشان لما روح المصنع محدش يعرف ان اللبن ده بايظ او او يعنى غش فى غش . رابعا وهو الأمراض اللى فى البقر نفسه طبعا كلكم عارفين انى كنت تعبان بسبب فيرس بيتنقل من البقر للانسان وهو البروسيلا المرض ده خطير جدا بس الحمد الله انا خفيت دلوقتى بس الفيرس لسه فى جسمي محدش يخاف مش بيتنقل من الانسان للانسان المهم الفيرس ده بيعمل ايه بيعمل حمي وممكن يؤدى الى العقم ثم الموت بيتنقل للانسان عن طريق حاجات كتير منها اللبن - اللحم - الأجزاء التناسلية وانا اتنقلت ليا عشان كنت بولد بقرة قبل كدا كان عندجها البروسيلا . المهم اللبن ده بيتحلب عادى وبيتنقل على اللبن النضيف وبيروح الشركات عادى خالص وفيه مرض تانى اسمه التهاب الضرع واللبن بتاعه بيجيب حمى برضه وامراض كتير برضه اللبن ده بيتنقل
للمصانع
طبعا عارفين أسامى المصانع الكويسة والمصانع الوحشة وأكيد الكويس فى مصر هو احسن الوحشين تانى حاجه منتجات اللحوم طبعا مفيش مصنع الا لما بيستعمل اللحوم المجمدة المستوردة من البرازيل والله اعلم انها ممكن تكون مدبوحه بطريقة شرعية ام لا . انا روحت لمصنعين من اكبر المصانع فى انتاج اللحوم المصنع الاول كان جامد ولا ينفع ببصلة كان كله مفتح يعنى عرضة للفيران كانت البنات اللى شغاله هناك مش لابسة جونتيات ولابسه دهب واللى واللى واللى بلاش قرف بقى وبيمسكو المنتجات باديهم ومش عايز اكمل الباقى أما بالنسبة للمصنع التانى كان نضيف جدا جدا جدا بس اللحمة مستوردة برضه طيب ايه الحل
الحل انى مش باكل بره البيت خالص اى منتج من اللحوم او الالبان
الحل التانى ربنا يستر علينا من الحاجات دى آه احنا ممكن ناكلها ومش يجيلنا اى مرض بس على المدى البعيد اكيد فيه كتير من الامراض مستنيانا
انا عارف انى طولت عليكم بس انتو اصدقائى وانا خايف عليكو

.... تحديـــث ....

أنا كنت قلت انى هقول على حاجه مهمة فى التعليق بس قلت يكون هنا أحسن :

دلوقتى فيه حاجه إسمها الوقيع والوقيع دى عبارة عن بقرة أو عجل اى حاجه يعنى مريضة وبتموت طبعا بتعزل لوحدها فى المزرعة وبتاخد أدوية وبيكون جنبها واحد بحيث لما تيجي تموت يقوم دابحها عشان المزرعة متخسرش طبعا بعد ما تتدبح بيتصلو بجزارين بييجو يشتروها بثمن رخيص جدا ويبعوها عادى فى المحلات ويقولو دى لحمه ظازة وكلام من ده المشكلة مش فى كده المشكلة فى حاجتين الأولى ان الحيوان ده قبل ما يدبح اخد أدوية كتير جدا ومنها مضدات حيوية والمضادات الحيوية دى بتجيب عقم . أما الحاجة التانية ان فيه ناس مش عندها اى ذمة ازاى اقولكم واحد قاعد جنب البقرة وماتت منه من غير ما يشوفها يقوم دابحها وهى ميته ويفضل يدوس عليها عشان تنزل دم ويقول انه دبحها وهى كانت بتموت طبعا بتبقى اللحمة دى محرمة الحل بقى فى الموضوع ده حاجه واحده بس ان الواحد لما يشترى من الجزار لازم يشوف ختم المجزر على اللحمة وده ضرورى جدا .

وربنا يستر علينا جميعا

Sunday, June 24, 2007

نحن نريد هذا الحب


ذات صباح مشحون بالعمل وفى حوالي الساعة الثامنة والنصف دخل عجوز يناهز الثمانين من العمر لإزالة بعض الغرز له من إبهامه وذكر انه في عجلة من أمره لأنه لديه موعد فى التاسعة.. قدمت له كرسيا وتحدثت قليلا وأنا أزيل الغرز واهتم بجرحه
سألته اذا كان موعده هذا الصباح مع طبيب ولذلك هو فى عجلة؟

أجاب: لا.. لكني أذهب لدار الرعاية لتناول الإفطار مع زوجتي
فسألته عن سبب دخول زوجته لدار الرعاية؟
فأجابني: إنها هناك منذ فترة لأنها مصابة بمرض الزهايمر.. ضعف الذاكرة
وبينما كنا نتحدث انتهيت من التغيير على جرحه..
وسألته: وهل ستقلق زوجتك لو تأخرت عن الميعاد قليلا؟
فأجاب: إنها لم تعد تعرف من أنا.. إنها لا تستطيع التعرف عليّ منذ خمس سنوات مضت
قلت مندهشاً: ولازلت تذهب لتناول الإفطار معها كل صباح على الرغم من أنها لا تعرف من أنت؟
ابتسم الرجل وهو يضغط على يدي وقال: هي لا تعرف من أنا.. ولكني أعرف من هي
*******
اضطررت أن أخفي دموعي حتى رحيله وقلت لنفسي: هذا هو نوع الحب الذي أريده فى حياتي
*******
نحن جميعا نريد هذا الحب فى حياتنا
نريد ان يحبنا من حولنا هكذا
والدينا، واخواننا، واصدقاؤنا وأهلنا وابناؤنا

... منقول ...

لو مكانى هتعمل إيه

دلوقتى فيه مشكله مش عارف حلها إيه

إحنا إتنين اصحاب زمان كنا بنحب بعض أوى لدرجة محدش يتصورها حصلت شوية خلافات بينا وسيبنا بعض يعنى معدناش بنكلم بعض وعرفت بعد كده إنى كنت بتعامل معاه بأسلوب وحش شوية بس من غير قصدى وهو دلوقتى بيكرهنى جدا جدا جدا

مش عارف أعمل إيه ؟

إرجعلى أنا محتاجلك

Thursday, June 21, 2007

وحيد


وحيد أكيد أنا وحيد كل يوم بيمر عليا بتأكد إنى وحيد حاسس بالوحدة بطريقة فظيعة انتو عارفين زى إيه زى الواحد لما يكون شبعان علطول ومرة واحدة يكون جعان إحساس رهيب بجد حتى كانت فيه انسانة كنت بعتبرها زى أختى وأكتر برضه مش بتكلمنى وبتتهرب حتى من الرسايل اللى ببعتهالها قلت خلاص هلاقى حد احكيله على اللى جوايا يمكن أستريح وأحول دموعى لكلام اتكلم ولا أعيط الإتنين أسهل من بعض عندى لو معرفتش أتكلم أعيط ولو معرفتش أعيط أتكلم أختى أو صدقيتى سابتنى هى كمان وبعدت يبقى أكيد العيب فيا مش عارف بس متأكد إن العيب مش فيا جيت النهاردة وعملت حاجه غريبه اوى دخلت على البلوج بتاع الإنسانة اللى كنت بحبها إستغربت أوى بجد إستغربت لقيتها كاتبه حاجات جميلة اوى بس ازاى مستغرب ان انسانه مع قلب حجر تكتب الكلام ده كلام بجد تبكى له القلوب إزاى يطلع من قلب حطم انسان وخلاه يعيش العذاب ده كله انا تعبان اوى يا ريتنى ما دخلت على البلوج بتاعها عرفتو بقى لما كنت بقول انا كل ما انساها حاجه من ناحيتها تفكرنى بيها كل يوم بيجيلى خبر عنها وهى بتعمل ايه وبتحس ازاى وبتحب ايه وبتكره ايه وبتاكل ايه كمان آآآآه زمان كان نفسي أرتاح بأى طريقة حتى ولو كانت الموت عشان أستريح لاكن لما شوفت الموت هربت منه مع إنى كنت محتاجه دلوقتى خلاص بقى ملازمنى الفيرس اللى عندى دلوقتى خلاص قالى مش هسيبك انا معاك بقيه عمرك هههههه أخيرا لقيت حد بيحبنى كده وهيبقى معايا بقيه عمرى مش مهم هو ايه المهم انه معايا وخلاص محدش يخاف المرض ده مش معدى ولا حاجه ههههه نفسي أنساها أوى إرحمنى يا رب إرحمنى من العذاب اللى أنا فيه أنا أتعذب وهى ....... أنا عارف انها بتحب واحد تانى وهو بيحبها على رأى واحد أنا بحب حب من طرف ثالث يعنى اتنين بيحبو بعض وانا قاعد معاهم وبس . أعمل إيه أعمل إيه حتى قلت إنى أعمل البلوج ده يمكن أتعرف على حد وأثق فيه ,احكيله يمكن يخف عنى وأديله كل حاجه عشان الواحد مش ضامن اى حاجه الأيام دى وعايز حد يكمل المسيرة كفاية كده عشان إيديا بتترعش ومش عارف اكتب

Wednesday, June 20, 2007

طلع الغلط اللى فى الصورة

طبعا فى الصورة سور الصين العظيم وتمثال الحرية الغلط اللى فى الصورة مش الأماكن الغلط فى حاجه تانية فين بقى ؟

Tuesday, June 19, 2007

بجد مش عارف

أنا مش عارف أقول ايه بمعنى اصح مش عارف اكتب ايه مش لاقى حاجه اقولها آه مش تقولولي مبروك :) مش أنا دلوقتى بقيت مدير المزرعة اللى انا فيها أصغر مدير مزرعة هنا لول تخيلو مدير مزرعة عنده 24 سنه وماسك مزرعة 2000 راس بس بجد مسئولية جامدة جدا بس انا مبسوط اهو الواحد بيتعلم الحمد الله على كل شئ أنا لسه تعبان روحت عملت تحليل دم تانى الدكتور قالى لسه نسبه الفيرس عندك عالية وادانى حقن تانى انا مش عارف هخلص من ده امتى انا تعبان اوى بجد الحقن مقرفة سواء كان الوجع بتاعها او تأثيرها أنا سمعت ان الواحد لو اخد منها كمية كبيرة هيأثر على السمع هو الواحد كان ناقص بس يا ربى سواء كان نفسي او جسدي المهم نفتح فى موضوع تانى انا مقلتش ليكو عن دموع التماسيح انا عايز اعرف ليه سموها دموع تماسيح عشان لما تشوف التمساح فى الميه تلاقيه بيدمع يعنى هو كده طيب ليه وصفوها للانسان بكده ولا عاملة زى اللؤلؤ (اللؤلؤ : دموع لامعة سقطت من أعين النساء ولم تستطع ملوحة البحر إذابتها ) بالنسبة لدموع التماسيح انا شوفتها فى عنين واحده كانت غالية عندى لما شوفت دموعها فى آخر مرة كنت معاها بقولها بلاش دموع بتقولى انا برضه عندي احساس وبحس هههههههههههههه لول ساعتها والله انا كتمت الضحكة جوايا قلت فى نفسي بتحسي ازاى لو انتى بتحسي فعلا كنتى حسيتي بالنار اللى جوايا لما بشوفك بتقطعى فى قلبى يبقى فعلا لؤلؤ ولا تماسيح :) . فاكرة لما قلتلك انا تعبان محتاجك جنبى يا (س) فاكرة ياما قلتهالك وانتى ولا هنا سبتينى مرمى وسيبتى الدنيا بتنهش فى قلبى المجروح ولا المنظر اللى عمرى ما هنساه مع انى بندم انى عملت كده لما كنا مع بعض آخر مرة واتصل بيكي قبل ما اركب القطر وانتى بتبصى للرقم بتاعى على الموبايل بتاعك وبتوريه لصحبتك بكل استهتار وحسيت من المنظر انك بتقولى فى نفسك هو بيتصل تانى ليه مش خلاص خلصنا ما تغور بقى يا اخى باتصالاتك دى مش عايزة اسمع صوتك او اشوف وشك تانى صدقينى فى اللحظة دى انا انهرت بجد و احتقرت نفسي انى اتصلت بيكي كنت عايز اشوفك واسمع صوتك لآخر مرة فى عمرى حزين قلبى حزين انه عرف قلب مش يقدر حبه فالعقل له ألف لسان .. والقلب له لسان واحد بس وأنا مش قادر أتكلم يعنى انا غلطان انى معملتش زى الناس وأقول لها أنتي أجمل امرأة في العالم فتصدقني وبعد كده أتعامل معها كأي امرأة . انا عارف انى الغلطان وهبقى احط محادثة ليا معاها عشان تعرفو انى فعلا انا اللى غلطان :) أنا مش عارف مين الظالم دلوقتى على رأى المثل كثيراً ما تكون نصرة الظالم أشد قسوة من ظلم الظالم لمن ظلمه. انا مش عارف انا بتكلم عنها ليه تانى يمكن عشان انا حلمت بيها امبارح طيب ليه انا حلمت بيها تانى مش عارف يا ريت تسبينى فى حالى انا حاسس ان ربنا هيوفقنى مع واحدة تقدر حبي ليها قريب ان شاء الله وزى ما سمعت قبل كده من لا يحلم بالحب ولا يحب أن يحلم .. إذا إنه لا يحيا!! انتو عارفين الانسانة اللى هتكمل معايا بقيت حياتى صدقونى هخليها تعيش باذن الله اجمل واحلى ايام فى حياتها ويا رب يجعل يومي قبل يومها لانى مش هقدر اعيش من غيرها للحظة واحدة لانى عارف باذن الله ان ربنا هيوفقنى مع واحده عارفة ربنا واحدة صالحة وجميلة وذرية صالحة باذن الله فالحرب الوحيدة التي احترمها هي (حرب طرواده) فقد كانت من أجل امرأة جميلة :) وربنا يسامح الجميع بس انا مش هقدر اسامح مش هقدر اسامح لما الاقى انسان علمته كل حاجة واديته كل حاجه بيضربنى فى ضهري بسكينه تلمة اوى لغاية ما قسمت قلبى نصين :) ربنا يسامحها فى الآخر بقول انا دلوقتى حاسس انى هوصل باذن الله وربنا يوفق الجميع :) . مع انى مبحبش الكدب و (س) كدبت عليا كتير انا برضه كدبت عليها لما كنا مع بعض فى آخر مرة قلت ليها انى سامحتك آسف يا (س) انا بدعى من ربنا انه يسامحك بس أنا عمرى ما هقدر أسامحك سلام :) .

تعبت

أنا مش عارف أكتب واقول إيه أنا تعبان أوى دلوقتى من شوية جالى أخبار عن س أنا خلاص كل يوم بيفوت علا بحاول أنساها لاكن لازم حاجه تيجي تقف قدامى وتقولى انت رايح فين لسه بدرى عليك يا ابنى لسه هتتعذب اكتر واكتر ليه حرام أنا معملتش حاجة غلط أنا عمرة ما أذيت حد عمرى ما زعلت حد فى حياتى مش كفاية الجرح الكبير اللى فى قلبى اللى مش عارف أداوية ليه يا ربى أنا كل ما أحاول أنسي لازم حاجه تطلعلى مرة ألاقيها نفسها تتصل بيا ومرة أحلم بيها ومرة أعرف عنها حاجات ممكن تضرها وأنا واقف غيدي متكتفة مش عارف أعمل ايه أنا تعبت حاسس ان الديا كلها بتكتب عليا ليه ... ليه بتكدب عليا عشانها .. مش كفاية إنى وحيد محدش معايا محدش بيمسع دمعتى اللى نازلة بسرعة 120 كم/ساعة محدش بيفكر فيا محدش بيسأل عليا أنا شايف إنه عادى فيه ناس كتير كده بس أنا فى الأول مكنتش كده كان موجوده انسانه بتهتم بيا بتمسع دمعتى بتسأل عليا ومرة واحده اختفت أنا مش عارف أعتبرها إيه دلوقتى من المفقودين ولا من ..... أنا عايز حل يا ريت حد يقولى حل أنا مش قادر أنقل قصتى معاها على البلوج هنا وهاسيبها مكانها على السبيس بتاعى عشان ل حد فكر إنه يعمل فيلم يققى ياخد القصة منه وهينجح لأن القصة مليانه خدع وخيانه بالعبيط كفاية آخر يوم قابلتها فيه كانت الحلقى رقم 30 فى المسلسل بس مش عارف آخرتها إيه معايا أنا دلوقتى سامع إنها فى مشكله ودى ممكن تكون آخر حاجه ممكن أساعدها فيها وربنا المستعان .
يا رب أنا عايز أنساها بقى أنا تعبت أنساها زى ما نسيتنى أحب تانى زى ما هى بتحب دلوقتى حد غيرى يا رب يا رب

الشبكة

هى دى الشبكة المتفق عليها يوم 4/19/2005




Monday, June 18, 2007

11/10/2002

النهاردة 11/10/2007 الساعة 3.5 ص أنا مكتبتش من زمان أو بمعنى أصح أنا كنت بكتب كل يوم على اللى بيحصلى فى المزرعة يومياتى يعنى لاكن حصلت الفاجعة وهو إن الهارد بتاعى اتسرق من جهاز الكمبيوتر بتاع المزرعة أنا زعلت جدا لدرجة إن مزاجى وحش اوى لغاية دلوقتى الهارد اتسرق يوم 3/6/2007 المهم أنا مش زعلت على الهارد نفسه أنا زعلت على اللى جوا الهارد كان عليه أيام حياتى كلها اللى عشتها مش مهم أقول هى إيه بس حاجات مقدرش أرجعها تانى أنا تعبان أوى حكاية الهارد دى جيت فى وقت مش وقتها خالص إمبارح كان يوم عمرى ما هنساه ورجع كل حاجه ليا كان يوم 10/6/2007 اليوم ده هو مش عارف أقولها إزاى بس اليوم ده كان أول مرة أشوف فيها (س) كان يوم 10/6/2002 كنت أول مرة أشوفها كان فى دمنهور فى محطة القطر اليوم ده مقدرتش أنساه ومش قادر أنسى أى حاجه أنا كنت بضحك على نفسي وبقول إنى نسيت بس بجد مش قادر أنسى أى حاجه كل ما أفتكر اى حاجه حصلت بينى وبينها بحس إن عينى بتدمع بس مقدرش أنزل دمعة تانى لانى هتعب أكتر الأجازة اللى فاتت ليا كانت غريبة أوى أنا كنت قلت إنى اتكلمت مع الإنسان اللى هى بتحبه وقلت له إنها بتحبك خلى بالك منها أنا مش عارف أنا جالى قلب إزاى إنى أقوله الكلام ده أنا مش شايف إنه من حقى بس من خوفى عليها أنا إتكلمت معاه وقلتله عشان تعيش سعيده فى بقية حياتها معاه المهم الأجازة اللى فاتت لقيته بيكلمنى بعد فترة طويلة مكلمتوش فيها المشكلة إنى لقيته داخل عليا ويقولى حبيبى وحاجات زى دى محتطش فى دماغى وقعد يقولى إنت مش جاى الإسكندرية بقى عشان نشيش على القهوة وكلام من ده إستغربت من كل كلامة إزاى هتبقى العلاقة بينا كده مع أنا عارف وهو عارف إن لا يمكن إن يكون بينا أى علاقة لو علاقته بيها إتطورت ... إزاى هتبقى العلاقة بينا كده وأنا شوفت فى عنيها حبها ليه إزاى وهو أخد مكانى فى قلبها أنا عارف إنه ممكن يخش على البلوج ده ويقرى الكلام ده بس انا مبعرفش أخبى حاجه فى قلبى كل اللى فى قلبى على لسانى ... من حوالى شهر إتعرفت على انسانه كويسة أوى بجد ... كان زمان كنت بكرهها أوى لأنى كنت بحسبها السبب فى فشل العلاقة اللى بينى وبين (س) بعد أربع سنين مع بعض لاكن أنا بعد ما إتكلمت معاها مش عارف انا قلبى استريح ليها وقعدت أحكى ليها وأتكلم معاها وأطلع كل اللى جوايا معاها مستغرب إزاى أستريح فى كلامى مع حد بعد المدة دى كلها ... أنا مكنتش بحب أتكلم مع أى حد فى حاجه خصوصية ليا ساعتها قلت ان ربنا بعتلى ملاك يريحنى شوية الأجازة اللى فاتت مشوفتهاش خالص آه انا كان نفسي اتكلم معاها وأحكى ليها على اللى حصل ليا الأيام اللى فاتت وإزاى انا بدأت أنسي لاكن ملقتهاش قلت بس خلاص هى بتتهرب ليها حق يا أنا واحد كلامى كله عن الجرح اللى إتجرحته كإن يا أخى أنا أول واحد أتجرح آه مع إنه جرح كبير بس عادى إتعودت وأنا بكفر عن ذنب ... الذنب ده عمرى ما هنساه وهو إن خليت إنسانه كويسة جدا أى إنسان يتمنى إنه يرتبط بيها بس أقول إيه جمال ملقتش زيه أخلاق بصراحة مقدرش أوصفه عارفه ربنا كويس أوى وكانت بتحبنى أوى أوى باعت كل حاجه عشانى لاكن أنا مقدرتش كل الحب ده سيبتها لوحدها مع عذاب الفراق حتى موقفتش جنبها كل ده عشان إنسانة تانية متستاهلش أى حاجه لدرجة إنى من كام اسبوع اتكلمت مع واحدة زملتى وقلت لها تتصل بيها وتقولها محمد العشرى بيقولك سامحيه لانه تعبان وبيدوق المر اللى انتى شوفتيه ردت عليا وقالت ليا إنها مسمحانى ولو عايز أكلمها آخد رقم تليفونها ... بس أنا موافقتش عشان هى دلوقتى مكتوب كتابها ومش أقدر أرجع أى أيام عدت منا أو افكرها بيا حتى عشان متتعبش فى حياتها أنا عارف هى بتحبنى قد إيه بس أنا محبتهاش أنا كنت بلعب بيها مش عارف ... أنا عارف أنتو دلوقتى بتقولو عليا إنى واحد معنديش قلب بس بجد أنا عارف انى غلطان ومتأكد إن كل اللى بيحصلى ده بسبب الذنب ده طيب أعمل إيه مش عارف مش عارف ... نعمل فلاش باك كده ليوم 10/6/2002 ركبت القطر اللى رايح دمنهور كان طالع الساعه 8.50ص من المنصورة متجه إلى الإسكندرية وصلت الساعه 10.40ص قعدت أستناها لغاية ما جت قالت ليا إنها هتلبس جيبه أبيض فى أسود مقلمة كده هههههه قعدت أبص لكل الجيبات اللى كانت ماشية قدامى لغاية ما لقيت واحدة جاية من بعيد وبتضحك ليا بصيت على الجيبة لقيتها المطلوب قعدت معاها 4 ساعات فاتو كأنهم أربع دقايق آه كل شكلها مش زى اللى كان فى مخيلتى بس بس .... ممكن نقول إنى إستلطفتها لما كنا بنتكلم على النت المهم قعدنا نتكلم كلام كتير أوى بصراحة مش فاكر منه أى كلمة :) المهم من غير ما أطول كان يوم جامد بجد نرجع بقى لدلوقتى فات اليوم معايا 10/6/2007 عادى جدا مع تعب فى الشغل مع مزاج مش حلو مع صداع خفيف مع عدم نفس للأكل هتصدقونى إنى دلوقتى باكل عشان مقعش من طولى أنا مليش نفس لأى حاجه بجد الأيام دى مش عارف ليه كل اللى باكله هو من 3 إلى 4 معالق رز +شيبسي . ده فى الغداء طبعا أنا مش بفطر أما العشا بقى فقطعه حلاوة + رغيف من الخبز ويمكن مش أتعشى كمان وباقى اليوم تدخين وممكن علبة كانز بيبسي بس ده ممكن يكون اليوم بتاعى وجيت أوزن نفسي لقيتنى فى أسبوع نازل 4 كيلو :( ... صديقة ليا قالت فى يوم ليا فيه دكتور نفسانى كويس أوى ممكن تروح ليه .... ههههههه دكتور مين يا بنتى أنا مش عايز دكتور أن عايز إنسانة تحس بيا تعرف أنا عايز إيه من غير ما أتكلم تسأل عليا .. تطمن عليا أحس إن فيه حد بيفكر فيا ده اللى محتاجه أنا حاسس إنى وحيد . بس واليوم عدي بخير .

Saturday, June 9, 2007

الحقيقة المرة

ترددت كتير انى كتب عن اليوم ده بس من فراغي قلت اكتب وافتكر صحيح انا بع اليوم ده نسيت كل حاجه بس اهو الواحد بيتسلى مش معنى انا اللى مش اتسلى ما الكل بيتسلى عليا :) المهم (س) اتصلتن بيا لما انا كنت تعبان مش عارف جالها قلب ازاى تتصل بيا انا مش عارف اوضح اللى حصل لانى بجد مش فاهم ايه اللى حصل كنت بتكلم معاها عادى والله ما انا فاكر المهم كنت طلبت منها انى اشوفها وهى وافقت انتو عارفين انا كنت عايز اشوفها ليه عشان كان فيه حاجات كتير اوى انا كنت عايز اعرفها ومش ممكن اعرفها الا لما اشوفها فى عينيها كان ممكن اسالها فى التليفون او على النت بس انا مش كنت واثق من الحقيقة قلت لازم اشوفها عشان اشوف عنيها اعرف هى فعلا بتقول الحقيقىة ولا بتكدب وكان فيه غرض تانى انى اشوفها وهو انى اشوفها وحشه فى عنيا عشان ابعد عنها :) المهم اتفقنا انى اشوفها يوم خميس مش فاكر كان يوم كام المهم روحت ولسه هركب العربية للبلد اللى كليتها فيها اتصل بيها تقولى معلش يا محمد اصل انا تعبانه النهاردة ومش قادرة اروح الكلية متكلمتش قلتلها الف سلامه وقفلت يوم اتنين قلتلها آخر طلب منى انى اشوفها وبعدها بجد هبعد خااااااااالص اتفقنا انى اشوفها يوم الأحد 29/4/2007 وده اليوم اللى من حياتى بقى سافرت الصبح مكنش جايلى نوم محتار لما اشوفها هقول ايه سافرت بدري اوى الساعه 6.30 قلت عشان اشوفها بدرى بدرى وامشى وانا فى المنصورة قبل ما اركب اتصل بيها تقولى انا لسه فى البيت ومش هكون فى الكليى الا الساعة 12 الظهر بصراحة انا جالى هستيريا ضحك قعدت اضحك لغاية ما قبلتها الساعه 12.17 ازاى بقى الأول قلتلها انى هكون فى محطة القطر عشان نقعد مع بعض شوية وننمشى الساعه 12 اتصلت بيا بتقولى انا فى الكلية ومش هقدر اجيلك تعالى انت مش انت عايز تشوفنى هتشوفنى وخلاص قلتها اوكى قلت فى نفسى احيه بعد كل ده وتقولى اشوفها وامشى اتأكدت انها كانت بتتهرب منى من الأول هى مش بتحبنى يا جدعان وانا الحمد الله اتأكدت انها بتكرهنى وانا دلوقتى بكرها والله العظيم انا بكرهها المهم ركبت العربية وروحت ليها قابلتها الساعه 12.17 الظهر ساعت ما شوفتها محستش الاحساس اللى كنت بحسه لما كنت بشوفها كنت بحس انى طاير لاكن المرة دى كنت قرفان لول كلمة كول اوى المهم قلتها ممكن نقعد شوية ونتكلم قالتلى فيه مكان هنا نقع فيه شوية وخلاص قلت لها اوكى روحنا مكان فعلا كان جدير بالطلب كان مكان مقزز جدا المهم قعنا ازيك ازيك الحمد الله تمام عايشين المهم طلبنا اتنين مياه بطعم البرتقال كان عصير مقزز جدا المهم الحمد الله اهو اتشرب وخلاص اتكلمنا شوية بجد كانت عنيها وحشانى اوى كانت عنيها واخده كل اهتمامى فى المقابلة دى كنت جايب كل حاجة خاصة بيها عشان اديهالها تتصرف فيها لانى مش قدرت اعمل فيهم حاجة المهم كنت كتبت ورقة فيها ذكريات قديمة بجد وانا بكتبها قعدت اعيط كتير وانا بكتبها المهم هى شافتها وقعدت تقراها صدقونى انا مقدرتش استحمل لقيتها مرة واحة عنيها احمرت وقعدت تعيط خطفت الورقة من اديها قلتها لا اوعى انا مش عايز اشوف دمعتك كل دمعة انتى بتنزليها بعمر من عمرى كله المهم كان فيه كلام كتير بينا من الآخر انا بعترف انى السبب ايوا انا السبب انى ضيعتها من حضنى انا كنت وحش اوى معاها بس كانت هى برضه مشتركة فى السبب ليه انتى مش قلتى ليا عن السبب ليه انتى مش غيرتى فيا ليه المهمقالت ليا انها جعانه قلتها عايزة ايه وانا اجيبه ليكي قالت آكل أى حاجه انا كنت ساعتها ممنوع من اللحوم والألبان عشان كنت ممنوع عنهم يعنى قلتها طيب انا عندى فكرة كان فيه مطعم كنت علطول لما أقابلها كنا نروح المطعم ده قلتلها اوكى يلا نروح المطعم قالت لا قلت ليه قالت انا مروحتش المطعم ده من زمان الا مرة واحدة بعد آخر مرة كنا فيه مع بعض قلت لها طيب عشان خاطرى ممكن نروحه لآخر مرة قالت اوكى ماشى مشينا وانا مش عارف اقول ايه ركبنا العربية برضه مش عارف اقول ايه كل اللى حصل منى انى قاعد ابص لعنيها وصلنا المطعم لقنيها زحمة لسه بقولها يلا نمشى لقيت واحد شغال هناك بينادى علينا عشان مكان فضى ياااااااه سبحان الله المكان اللى قعدنا فيه ده كان المكان اللى اول مرة المس فيها ايديها هههههههههه على رأى عمرو دياب نفس المكان اللى كان بيجمعنا سوا هههههههههههه المهم عرفت منها كل حاجة عرفت كرهها ليا عامل ازاى عرفت منها كل حاجه كنت عايز اعرفها واتأكدت منها وحسيت بيها اوى وانا ببص لعنيها كانت عنيها بالنسبة ليا شاشة بيتعرض فيها كل الحقيقة اللى انا كنت عايز اشوفها واعرفها بعض الأسئلة سألتها ليها وجاوبت عليها وعرفت الحقيقة وهى : انها مش بتحبنى انها بتحب شخص تانى للأسف انسان غيري مكنتش حاسة بيا لما عرفت الحقيقة المرة انا سعقت بجد وهى ولا هنا قاعده تاكل ولا فى دماغها انا مش قادر ارفع المعلقة آكل بيها وهى بتاكل عادي من طريقة أكلها ولقيتها انها مش حاطه فى دماغها زعلى او كسرة قلبى وعادى خالص وهى بتاكل ولا أكن فيه واحد قدامها بيتعذب أو بيتدمر :)عرفت انها فعلا بتكرهنى لا مش تقولى انك مش بتكرهينى لا انتى بتكرهينى لو فعلا مش بتكرهينى مكنتيش عملتى فيا كده قعدت ابص لعنيها وانا محطم قلبى ساعتها كان بينزف مع كل قطرة من دمى كان كل ذكرى حلوة معاها كانت بتتحطم وتتحرق قدام عينى سلمت امرى لله قعدت اتفرج عليها وهى بتاكل لغاية ما خلصت قلت لها ممكن يلا نمشى مشينا قعدنا ماشين وانا مش حاسس بأى حاجه قالت جملة حلوة اوى ههههههههههههههههههههه قالتلى بص يا محمد أنت بتحب واحده بتحب واحد تانى وأنا بحب واحد بيحب واحده تانية ضحكت هههههه ضحكه كلها دموع وعذاب قلتلها هو فيه ايه احسن منى عشان تحبيه قالت فيه حاجات تتحس مش تتقال قلتها بس انا اتغيرت قالت يا ريت يا محمد كنت تبقى كده من زمان قلت فى نفسي فعلا كنت لازم افهم من زمان من فترة صغيرة كانت بتغلط فى اسمي وبتنادينى باسمه مبروك يا عم هتعيش يلا حلم ومات فعلا حلم عمرة ما كان حقيقة المهم وصلتها لغاية القطر مكنت عايز ابص لعنيها وهى ماشة سيبتها ومشيت وانقطعت كل حاجه بينا ان مش عارف بكتب الكلام ده ليه انا بجد نسيت انها حبيبتى هى بالنسبة ليا زى اى واحد من الناس مفيش فرق بينها وبينهم فكرت انى اقول للانسان اللى بتحبه انها بتحبه عشان يحس بيها ويحبها كان كل همى سعادتها :) انا عارف هتقولو عنى مجنون بس اهم حاجة عندي سعاده انسان حتى لو كان على حساب سعادتى انا انتو عارفين انا كان نفسي فى ايه لو كنا بقينا لبعض :) بدون ضحك كنت هخليها مش محتاجه اى حاجه كنت هعملها اللى هى عايزاه كنت هعمل لها حاجه كانت نفسها فيها اوى وانا كان نفسي فيها بجد انى اعملها عملية تقويم اسنان هى كانت محتاجاها وكانت نفسها تعملها وانا كان نفسي اعملها لها عشان هى كانت عايزة كده بس هى كانت عجبانى من غير اى حاجه انا عارف كل حاجه (س) بتفكر فيها عارف كل حاجه بتحبها وبتكرهها حتى ولو فى امور انا مقدرش أقولها بجد حاجت مش تتقال عارف هى بتحب ايه وهى مش بتحب ايه كل كلمة كانت بتقولها بعرفها قبل ما تقولها من عنيها كنت الوحيد اللى بعرف اقرى عنيها والله اعلم اكيد فيه ح هيقدر ويقرى عنيها ويحس بيها زى ما كنت بعمل المهم خلاص راح اللى راح وعدى وانتهى كل شئ بسلام :) :) عارفين نفسي فى شريكة حياتى ايه انها تكون رفيعه شعرها طويل او مش طويل اوى يعنى :) تكون بيضه اديها حلوة رفيعة رجليها تكون حلوة برضه مع انى عمرى ما فكرت فى الحكاية دى فى حاجات اساسية بقى تعرف ربنا كويس اوى تعرف حقوقها وحقوق زوجها وأولادها وبيتها تكون شريانى طبعا فيه حاجات تانية كتير بس مش وقته انا عارف انها مش موجوده بس اللى خلانى اقول كده انى خليت انسانه فعلا تبقى كده :)
انتو عارفين انا كان زمان نفسي فى ايه بس محدش يضحك عليا عشان تعرفو ان كل حياتى زمان كانت احلام مش حقيقة بالمرة كان الحلم انى اكون راجع من الشغل واتصل ب (س) بعد ما نتجوز يعنى واتصل بيها فى التليفون تقولى انها بتعمل شوبنج مع بنتنا الصغيرة اصل انا نفسي فى بنت اوى واقولها اوكى انا جايلك عشان نروح مع بعض واحلى منظر فى الحلم ده بقى ايه انى شايف (س) وهى واقفة والبنت بنتنا واقفة جنبها وماسكة فى اديها وفى الايد التانية ماسكة المصاصة شكلها حلو اوى كان نفسي الحلم ده يبقى حقيق