Monday, December 15, 2008


Friday, June 27, 2008

كلام مهم أوى


انا دلوقتى بكتب البوست ده وانا بعيط بجد عايزين تعرفو ليه اقولكم ليه انا بكره بليل هغادر ارض الوطن طبعا مش بعيط عشان الوطن بعيط عشان روح قلبى هسيبها هنا لوحدها بس بقول لها مش تقلقى انا بعمل كل ده عشانك انتى وهرجع لك ان شاء الله فى اقرب وقت طبعا انا بشكر كل الناس اللى باركو لي فى البوست اللى فات ومش عارف اقول لهم ايه بجد عقبالكم كلكم ادعولى

Thursday, May 8, 2008

الدعوه عامة

بسم الله الرحمن الرحيم

طبعا كلكم عايزين تعرفو مين حبيبة قلبى
عايزين تعرفو مين اللى قلبى اختارها بعد كل ده
ان شاء الله يوم الأربعاء 14/5/2008
وعايز الناس كلها تسجل التاريخ ده
يوم خطوبتى وشبكتى يا جدعان
سوف يتم خطوبة
المهندس / محمد العشرى عبده محتاس
على الآنسة / داليا جزء منى
والدعوه عامة يا رجالة
مش عارف بجد أقول ايه
بس ادعولنا
إن شاء الله الخطوبة هتبقى فى كفر الدوار
فى قاعه إسمها دوار جحا
بجد الدعوه لكل الناس

Friday, May 2, 2008

بحبك


اممممم .. انا مش عارفه ابدأ ازاى او اقول ايه

اول حاجه انا مش محمد

اكيد يعنى مدام بتكلم بصيغه المؤنث

انا بس حبيت اعمل مفاجأه لمحمد و انزل البوست ده النهارده

انا جايه هنا عشان اقوله بحبك اوى يا محمد

بحب كل حاجه فيك

نفسي اعيش معاك كل عمرى

لانك عمرى و من غيرك يضيع عمرى

انت الوحيد اللى سلمتك قلبي من غير خوف

يارب نفضل مع بعض على طول و مانفترقش ابدا

و بقدم لك الورده الرقيقه دى

اللى دايما بتفكرنى بحبك ليا

لانه مش اقل من رقتها و جمالها

و قريب ان شاء الله اكيد محمد هيقدمنى ليكو

نفسي اشكر كل الناس اللى وقفت جنب محمد فى الوقت اللى كان المفروض انا اكون جنبه فيه ... تترد لكو فى الافراح

تحديث

من عبده محتاس

طبعا كلنا شفنا الكلام الجامد ده

والكلام ده من الإنسانة اللى حبتها بجد

بكره هتعرفو هى مين بس اقولكم ان الحب ده بقاله اكتر من 6 سنين

اه شوفنا كتير وحصل مواقف متتقلش بجد بس الحمد الله

انا بقولها وانا بحبك اوى ومقدرش استغنى عنك وانتى عارفه انى اللى بعمله ده كله عشانك وعشان نبقى مع بعض

فى القريب العاجل هحط اعلان بمعاد الخطوبة والدعوه عامة وهنبقى لامة

بحبك

Tuesday, April 22, 2008

محتاج دعواتكم معايا



أنا عارف انى إتأخرت عليكم كتير اوى سواء كان فى حكايتى فى الجيش او دخولى لبعض المدونات بس والله غصب عنى
انا دلوقتى داخل على موضوع ومحتاج دعواتكم معايا

مش عارف أعمل إيه

إدعولى

Saturday, April 5, 2008

بدون عنوان


أنا آسف انى مش قادر أدخل كتير على النت مش البلوجر لوحده
بس معلش لأسباب كتير منها
الشغل
الحالة النفسية يعنى متشقلبة شوية
الحالة العاطفية غير مستقرة يوم فوق ويوم تحت
أعصابى تعبانه جدا عشان أقلعت عن التدخين الحمد الله
ربنا يعديها على خير الفترة دى
بصراحة مش قادر أستحمل أعصابى تعبانه لوحدها أساسا مع عدم الأكل يعنى ممكن فى اليوم آكل نص طقة كده حاجه بسيطة والله وباقى اليوم مش ليا نفس
متلخبط
تفكير كتير فى حاجات كتير فى نفسي الوقت بحاول انهيها واحده ورا واحده
اللى انا عايزو منكم انكم تدعولى بس
وآسف لانى مش بدخل على أى بلوجر تانى للظروف اللى انا قلتلها
آخر حاجه نفسي أقولها ومن قلبى
نفسي أرتاح أوى
أنا عارف ان محدش بيدخل زى الأول البلوجر
بس عادى انا بكتب الكلام ده للفضفضة
ولأصحابى اللى انا عارفهم كويس اوى

Sunday, March 30, 2008

الجزء الثانى

بسم الله الرحمن الرحيم

وصلنا مركز التدريب طبعا كل واحد جايب معاه أكل وحاجات كتير واللى البيت عامل لابنه أكل بالهبل عشان جيش وبتاع
بس انا مكنتش متعود على كده أساسا
لقينا الظباط والصف ضباط بيقولو كل واحد معاه أكل يحاول ياكله او يرميه لان ممنوع دخول أى أكل فى المركز
طبعا كان موقف جامد كل واحد قاعد فارش قدامه الأكل وهات يا أكل مع ان الناس كانت شبعانه بس يقولو أهو احسن ما نرميه
انا الحمد الله فى اليوم ده مكنش ليا نفس لأى حاجه
مش عارف ليه
يمكن عشان دخلت الجيش
عادى ما اى واحد معرض انه يدخل الجيش
ولا يمكن عشان اول مرة يبعد عن حبيبه ومش عارف يكلمه او يطمن عليه مش عارف بجد
المهم
قعدنا لغاية المغرب كده وقالو كل واحد ييجى عشان ياخد حقنتين قال ايه ان الحقنتين دول هيحمو الواحد من جميع الأكراض اللى الواحد ممكن يشوفها فى الجيش لمده 6 شهور طبعا عادى أخدت الحقنتين فى دراعى وعلى البركة
قعدنا لغاية الساعه 2.30 بليل مستنيين دورنا فى استلام المخلة
وطبعا محدش يقولى يعنى ايه مخله عشان نزعلش منه
مش هطول عليكم ومش هقولكم اد ايه الواحد اتخنق من الانتظار لغاية ما نستلم المخلة دى
بس الحمد الله استلمنا وودونا على عنبر عشان ننام
وصلنا بالظبط الساعه 4.30 العنبر طبعنا انا نمت بهدومى مقدرتش اغير وغير كده اى حاجه فى اى حاجه المهم انى لقيت سرير وخلاص يا عم
الساعه 5.30 الفجر يعنى الواحد غمض عنيه نص ساعه بس بالظبط
يلا كله يجمع عشان طابور اللياقة
لياقة ايه يا جدعان اللى بتقولو عليه انا عايز اناااااااام
ولا حياه لمن تنادى
ومن ساعتها انا اكتر مده ممكن انامها لغاية دلوقتى والله 5 ساعات بالظبط مهما عملت
طبعا مكنتش اعرف حد لسه وكان العنبر بتاعى كان الفصيلة السابعه وكان كله من الغربية وكنا حوالى 6 او 7 من المنصورة وبقيت الأربعين من الغربية من مناطق متنوعه يعنى
:)
تصنيف المجوعات فى الجيش عشان محدش يتكلم كتير
الجيش بعده الفرقة بعده اللواء بعده الكتيبة بعده السرية بهدع الفصيلة بعده المجموعه

اليوم المعتاد لمركز التدريب
بنصحى الصبح طبعا والشمس أساسا لسه مطلعتش بقعد نجرى وبتاع وهبل فى الجبل اى حاجه فى اى حاجه ونقعد نعمل عملية نظافة فى المركز زبالين يعنى
نروح نتشطف ونغير هدومنا
الفطار
وبعدين نظبط العنبر عشان بيتفتش علينا
وبعدين طابور الصبح وطابور الثبات
ييجى بعد كده عساكر بس اقدم مننا مش فاكر اسمهم بصراحة يعلمونا حاجات ملهاش اى برناج فى اى حاجه ومش فاكر نعمل ايه تانى وبعدين الغدا وراحة وبعدين الساعه 5 طابور الهتاف عشان بس نغير الوجهه بتاعت الشمس الصبح الشمس بتبقى فى اليمين فالنص اليمين يبقى أسود وفى الهتاف الشمس تبقى فى الشمال فنكمل لون البشرة بالأسود الخالص بقى وده اللى استفدته من طابور الهتاف
وبعدين راحه بقى وعيش حياتك
طبعا انا كنت بنام قبل الفراخ مش معاها والله من التعب واللى كنت بشوفه كنت بنام الساعه 10 بليل
المهم نخش فى الموضوع
كنت تعبان اوى اوى مش تعب جسدى لا
تعب نفسي
كل يوم بيمر عليا بكون مش مصدق من اللى بيحصلى ده
غير كمان بعدى عن الإنسانه اللى بحبها ومش عارف عنها اى حاجه
غير حكم النفس على النفس
مع انى كنت بنزل كل يوم خميس أجازة ونيجي الجمعه بليل بس بس
مش عارف
على العموم كفاية كده لانى طولت اوى انا قلت لكم النظام والبوست الجاى هيبقى بقى بأحداث حصلت ليا فى مركز التدريب غير النظام اللى شوفته وهقول بكل صراحة اللى حصل


Monday, March 24, 2008

الجزء الأول

بسم الله الرحمن الرحيم

فى الأول هقول كلمتين
حكايتى فى الجيش أنا هكتبها كلها بما فيها المواقف اللى حصلتى فعلا جوا الجيش أو الحالة النفسية أو العاطفية وممكن تكون كمان بالتواريخ على ما أتذكر يعنى
وآسف لو ذكرت حد فى القصة دى
أنا عارف انى طريقتى فى كتابة القصة من المم
كن إن فيه ناس هتتخنق منى بالنسبة إنى بكتب كل حاجه بالتفصيل
بس أنا بحب كده مش عارف ليه
نبدأ

خلصت كلية فى آواخر سنه 2004 وقعدت أستنى الجيش حوالى 11 شهر وده أول حاجه تعبتنى وضيعت منى حاجات كتير
كنت فى السيبر بتاعنا كنت قاعد فيه ليل نهار وكانت الحالة العاطفية عسل وكنت مع البنت اللى بحبها وكانت بتحبنى اوى
وفى شهر 6 جه معاد تقديمى للجيش
طبعا كان الموقف عادى بالنسبة ليا كنت حاطط إحتمال إنى أخش الجيش بنسبة 90% بحيث لو دخلت مش أتعب نفسيا
كل حاجه إتطلبت منى عملتها لغاية اليوم اللى كان فيه نتيجة الإرجا والإرجا اللى هى انى ادخل الجيش ولا لا
كلنا كنا قاعدين على أعصابنا كنت ميت من القلق خايف خايف ان كل حلم حلمته يتدمر بدخولى الجيش
حلمت كتير أوى كتير كنت ساعتها بطلت سجاير من زمان المهم قاعد باكل فى ضوافرى ومستنى النتيجة
من غير ما ندخل فى تفاصيل وحظ وبتاع لبست
دخلت الجيش ظابط إحتياط
فى اليوم ده أنا شربت كمة سجاير كان حوالى 6 سجاير ما أنا مبطل بقى
قعدت مش مصدق نفسي عارفين لما الواحد بيطلع فى الروح وشريط حياته بيمر قدام عنيه بسرعه أنا كنت كده بس مكنش شريط حياتى كان كل حلم أنا حلمته
كنت بحلم إنى أشتغل وأخطب وأتجوز الإنسانه اللى بحبها وبتحبنى ونبقى مع بعض طول عمرنا
كان فى اليوم ده كنت متوقع إنى آخد تأجيل وكنت ناوى أعمل حفلة وهروح أقابل حبيبتى فى كليتها ونفرح مع بعض
لاكن لما لبست صدمت إتصلت بيا عشان تتطمن قلتلها خلاص أنا دخلت الجيش
مسمعتش صوتها ممكن عشان أنا كنت أمل ليها إننا نبقى مع بعض أو صدمة مش عارف المهم قعدت عشان ياخدو عينه دم عشان فيرس سى كان فيه ناس بتتمنى ان يكون عندها الفيرس عشان ميدخلوش الجيش
بس أنا كان عادى بالنسبة ليا هعمل إيه يعنى خلاص اللى حصل حصل روحت البيت عادى بليل كلمتها
قلت لها أنا دخلت الجيش وظابط كمان وعايز أسألك سؤال أنا قدامى كتير هتستنينى
قالت لى هستناك ومش هسيبك
فات يوم اتنين وجالى امتحان الهيئة عشان الظباط نجحت للأسف ودخلت ظابط بس الحمد الله جبت واسطة ونزلت عسكرى الحمد الله مع ان جه أيام كنت أتمنى أبقى فيها ظابط عشان الذل اللى أنا شوفته
نزلت عسكرى وجه يوم التسليم أول يوم ليا فى الجيش يوم 12/7/2005
المكان فى منطقة تجنيد الهرم
المعاد الساعه 7.30 صباحا
روحت لقيت ناس كتير اوى اوى
قعدنا فى الشمس لغاية الساعه 2.30 عشان هنتوزع كل واحد على سلاحه ومركز التدريب
كان فيه شنطه بيبعوها غصب على الناس كانت ب 20 جنيه فيها ورنيش ورباط بيادة ومعجون أسنان وحلاقة كده يعنى حاجات متجيش ب 5 جنيه بس كان لازم نشتريها
كنا فى شهر 7 وكان الحر جميل عسل لغاية ما الواحد كان بيبوش من الشمس جه الوقت عشان نعرف هنروح فى أنهى مكان للتدريب
والحمد الله كان مكانى فى مركز تدريب 3 مشاه فى قويسنا ركبنا الأتوبيسات وروحنا على محطة القطر عشان هنركب القطر الحربى اللى هيودينا قويسنا
وصلنا مركز التدريب
نكمل أول يوم فى الجيش فى البوست الجاى

Friday, March 21, 2008

إستفتاء

بصراحة أنا مش عارف أكتب إيه
بس جيت حاجه فى دماغى وعايز رأيكم فيها
أنا دلوقتى ناوى أكتب قصة حياتى فى الجيش
كلها كاملة
أنا قبل كده كتبت أجزاء منها بس عايز أكتبها من الأول وكاملة لغاية يومنا الحالى
بس عايز أعرف رأيكم الأول أكتب ولا لآ
أنا طالب بس 30 رد بالموافقة
30 رد بس عشان أبدأ أكتبها
سواء كانت من أشخاص أعرفها أو أشخاص مجهولة


Tuesday, March 18, 2008

أوقف المخدرات - غير حياتك

بسم الله الرحمن الرحيم


النهاردة وأنا فى الشغل كنت فايت على بلد إسمها ميت سلسيل
المهم
وأنا فايت بالعربية لقيت يافطة كبيرة مكتوب عليها
أوقف المخدرات غير حياتك
الجملة دى شدتنى أوى وكمان الرسمة اللى مرسومة
وكان كمان مكتوب أكتر من 10 أرقام تليفون موبايل لأى حد عايز يتعالج من الإدمان أو يعرف حد مدمن وعايز يعالجة
قلت فى نفسي يااااه كان فين من زمان الكلام ده
وطبعا كلنا عارفين موضوع الإدمان اللى انا كنت كتبته والقلم اللى أكلته على خدى
يلا خير
المهم
قلت أول ما أرجع البيت أدور على الحملة دى ولقيتها فعلا وطلعت تبع موقع الأستاذ القدير عمرو خالد
ربنا يكرمه يا رب
أنا جوايا كلام كتير عايز أقوله
بس كفاية الفرحة اللى أنا فيها بجد

Thursday, March 6, 2008

Sunday, February 24, 2008

الواد طالع لعمه


ده يوسف ابن اخويا انا قلت من باب التغيير انى اكتب على الواد العسل ده
يوسف ده بقى يا جدعان بيفكرنى بأيام شبابى
يا ليت الشباب يعود يوما
لو لاحيظتم هتلاقو عنيه زى عنين عمه
بوؤه زى بوؤ عمه
ودانه زى ودان عمه
شعره زى شعر عمه
منخيرة مش زى منخير عمه
هتقولو ايه الفرق أقولكم وانتو مالكم

يا ريتنى كنت معاهم
مين دول اللى ابقى معاهم والله ما انا عارف

انا قلت بقى أخليكو تشوفو يوسف على طبيعته
الفيديو ده كان فى فرح بنت عمتى شوفو الواد بيعمل ايه
الله يرحم زمان بيقلد عمه فى كل حاجه

video

يوسف فى الفيديو ده بقى مش عاتق حد
يا ابنى احنا فى الشارع
لا ولا حيات لمن تنادى
الله يرحمك يا محتاس كنت مدوخ نص بنات البلد
أيام يلا خي
video

معلومات عن يوسف
يوسف هيبقى عنده 3 سنين فى يوم 4/4/2008
يوم تاريخي أكيد
هتقولى ليا ليه هو تاريخي أقولكم وانتو مالكم برضه :P
يوسف وهو عنده سنتين بيقول من 1 لغاية 10 بالعنجليزى
طبعا مش زى عمه اللى عرف واحد بالعنجليزى وهو فى سنه اولى اعدادى
يوسف عارف كلمات كتير اوى بالإنجليزى وعمه نفسه ميعرفش يعنى ايه
أسامى حيوانات على خضراوات على فاكهه على حاجات كتير
وطبعا زى ما كلنا عارفين ان ده الفرق بنتى وبين يوسف
ربنا يخليه لأبوه اللى هو أخويا وأمه اللى هى مرات أخويا
ويخليه لجدو العشرى اللى صدوقنى ان ممكن يبيعنى انا شخصيا عشان يوسف
:D
يلا على رأى المثل أعز من الولد ولد الولد
ولاد كتير كده مش عارف ليه
المهم فى الآخر عقبالكم كده
بس
خلاص

تحديث
يوسف مش بيحب حد يقوله يا واد بيكره الكلمة دى اوى
يعنى لو شاف البوست ده ممكن ميكلمنيش لمده 45 يوم
بس

Tuesday, February 19, 2008

التغييييييير

بسم الله الرحمن الرحيم
التغيير
التغيير لابد منه فى الحياه ممكن الواحد يغير عشان ينسى اللى فات
وممكن الواحد يغير عشان بيتخنق من اللى معاه
وممكن الواحد يغير لان ده غريزة اساسية فى الانسان
أنا بقى قررت إنى أغير عشان كل حاجه فى حياتى
أولا
غيرت الموبايل لان الموبايل البقاء لله من يوم ما اللى حصل حصل وانا قمت خبطه فى الحيطه بس الحمد الله رجع حته واحده
قررت أبيعه لانى عايز أغير
الحمد الله حصلت على موبايل تانى بس بعد ما دفعت كل
اللى معايا فيه وكان تمنه 2100 جنيه مصرى لا غير
كنت محوشهم عشان اروح اخطب بيهم
بس قلت خلاص الموبايل أولى
جبت موبايل N73
اللى هو ده

تانى حاجه هغيرها هى طريقة حياتى
خلاص اللى راح راح وسابنى
قررت انى أشوف شغلى وبس
مش عايز حاجه تانية بقى دلوقتى
واللى يجيبه ربنا كويس
مش عراف أقول ايه بس كل جديد فى حياتى هقوله لان رأيكم بيفيدنى اوى
آه نسيت حاجه عايز أقولها
أنا بطبيعتى مش بحب لتغيير بالمرة بس الظروف اللى بتخلى الإنسان يغير
ولما ييجى الوقت للتغيير مش تتردد بجد غير لان ممكن يقلب عليك

Wednesday, February 13, 2008

محتاجكم معايا

محتاج دعواتكم معايا
دنيا آه اسمها دنيا اللى انا اتكلمت عليها
هى تعبانه اوى دلوقتى ومحتاج دعواتكم ان ربنا يقومها بالسلام
عشان خاطرى
بجد محتاج دعواتكم جامد

Tuesday, February 5, 2008

إحساس جديد

بسم الله الرحمن الرحيم


ازيكو يا شباب انا عارف انى إتأخرت عليكم بس والله ظروف خارجة عن إرادتى
وكمان بعتذر على انى مش هنزل البوست اللى انا قلتلكم عليه
لان فيه الأهم
أنا حسيت بتغييييييير كبير اوى فى حياتى
هتقولو ازاى هقولكم وانتو مالكم
:P
بهزر طبعا
المهم
أنا إكتشفت ان كان فيه جنب كبير اوى من حياتى فاضى وانا حاسس انه بيبدأ يتكون تانى
بصراحة انا مش عارف أقول هى إيه ولا لآ
بس إنتو مش أغراب ولا حاجه
أنا حاسس انى بحب
بجد والله أنا حاسس إنى بحب من جديد
مش عارف بس انا بقابل نفس الشعور من الإنسانه دى ناحيتى
إدعولى ان ربنا يوفقنى
أنا حاسس إن فيها المواصفات اللى أنا بدور عليها من زمان
يعنى جايه ليا جاهزة مش هقعد أظبط فيها تانى
كفاية اللى فات
أنا خايف أوصفها عشان بغير عليها
أنا عارف انها هتشوف الكلام ده وهتحس بيه ان الكلام ده ليها لانها بتحس بيا بجد فى أوقات لما أكون فيه حاجه
عشان كده أنا بقولها
ربنا يخليكي ليا يا رب

بس خلاص

Monday, January 14, 2008

إعتزار

أنا بكتب البوست ده دلوقتى وانا والله مش عارف أقول إيه
أنا مش عارف أعتزر لمين ولا لمين أنا عارف ان الأيام اللى فاتت دى ناس كتير زعلت منى من بعض الحركات
الأول إن فيه إنسان عزيز عليا أوى
حاولت أتصل بيه وهو مش بيعبرنى يعنى انا عملت ايه انا عايز أعرف
الشخص التانى هى واحدة أنا بعتبرها زى أختى والله وبتمنى ليها كل الخير أنا عارف انى لخبطت فى الكلام معاها الأيام اللى فاتت دى بس والله من غير قصد أنا بقولها معلش والله أنا دماغى سايحة من درجه الحرارة العالية تقريبا
بس مش هقول أكتر من كده