Wednesday, December 12, 2007

وجبنا أبو كاميرا يا ردالة


السلام عليكم
أنا بصراحة دلوقتى فيه حوالى من 3 الى 153 موضوع عايز أتكلم فيهم
حصلى حاجات كتير اوى اوى اوى الأيام اللى فاتت
من أول ما رحت الإستدعا لغاية يومنا هذا :)

يااااااااااااااه الأيام جرت عليا اوى
أكنى امبارح كنت بكتب انى رايح الإستدعى بكره
اهو الإستدعا راح من زمان والواحد رجع الشغل تانى وكمان قبضت محدش يقولى هات سلفية ولا حاجه
لانى عقبال عندكم جبت موبايل جديد من أبو كاميرا ده اللى نزل حدانا فى الكفر وخلاص علقنا الموبايل القديم على الرف وغير معروض للبيع أو ان حد يستلفه لان معاه ذكريات كتيرة اوى اوى اوى فعاينه على الرف
طبعا الكل عايز يعرف الموبايل القديمة ايه ودلوقتى جبت موبايل إيه
أقولكم
دى الصور
أنا بقول بلاش نحط صورة الموبايل القديم
المهم هو كان 3310
أما بقى الموبايل الجديد فهو 6131 ودى صورته



بعد عناء دام الخمس سنين
الحمد الله الواحد غير أهو يعنى تجديد
المهم
بعد مكا قبضت قلت س خلاص الواحد بقى يشد نفسه فى الشغل عشان نعوض اللى فات والحمد الله خير باذن الله آه الواحد تعب شوية بس إن شاء الله خير باذن الله
الشركة كانت عارضة عليا عرض انى أروح الفرع فى الإسكندرية طبعا انا فرحت اوى لانى كان نفسي أعيش فى الإسكندرية بس فى آخر لحظة قلت لا أنا كده كويس لأنى لأنى مش مهم
طالما أنا هنا أقدر أعمل حاجه كويسة يبقى تمام
أنا هبطت من الكتابة بس أنا مش ناسى حكايتى فى الإستدعى بس ربنا يسهل وأنا هكتبها دا فيه بلاوى والله
على فكرة أنا عيد ميلادى كمان كام يوم لما نشوف مين اللى فاكر
مع إن ولا مش مهم
لما نشوف
محدش قال مبروك يعنى مبروك على الموبايل

20 comments:

Anonymous said...

الف مبروك
التلفون حلو
الله يهنيك بيه

Rain man said...

مبروك يا عم الموبيل
و عقبالى
مع انك زى اغلب الشباب بتضيع فلوسك فى حاجات مالهاش لازمة للأسف
ده بدل ما تشترى ام بى فور ؟
زعلتنى منك
:P
مبروك يا باشا

Anonymous said...

مبروك الموبايل

همسات دافئه said...

ياااه بقالك كتير اوى غايب
أولا حمد لله على السلامه
ثانيا مبروك المبايل
ثالثا مستنيه حكاويك بتاعت زمان
رابعا بقى ودا المهم
يالا حالا بالا بالا حيوا ابو الفصاد
هيكون عيد ميلاده الليله أسعد الأعياد
فليحيا أبو الفصاد
هاااااااااااااا
كل سنه وانت طيب يامحمد:))))))))

3abdo me7tas said...

MĕŢø & ŘǿŖêĔ
الله يبارك فيك
دا من زوقك

.......................

rain man
الله يبارك فيك
عقبالك يا عم لما تجيب الأحسن
أعمل إيه بس الشغل يحكم عليا إنى أجيب موبايل جديد
المرة الجاية بقى أفكر فى ام بى فور
:)

3abdo me7tas said...

نفرتيتي

ده اللى قدرتى عليه
مبروك الموبايل
ماشى ماشى

.................

همسات دافئة

إزيك يا شيماء عاملة ايه
معلش والله الجيش وسنينه بقى
الله يبارك فيكي يا ستى
قريب ان شاء الله هحكى عن كل حاجة
وانتى طيبة
بس انا عيد ميلادى مش النهاردة

aya said...

السلام عليكم يا محمد
ديه اول مرة اجى المدونة
وكنت سمعت كلام حلو عنها كتير
المهم
الف مبروك على الموبايل
وزى ما ميدو قالك
المرة الجاية فكر فى الام بى فور

كل سنة وانت طيب

والسلام ختام

رحيق الحب said...

هاههههههههههه الف الف مبروك يا محمد بجد انت فقر
تصدق وتؤمن بالله انا برضو كان معايا 3310 وبعدين اخويا جابلى 6131 ليه بقى التقليد ده بس بجد مبروك عليك وكمان الف الف مبروك لرجوعك الشغل ربنا يوفقكك وبعدين احنا هنبدأها بخل من اولها يعنى ايه مش هتسلف حد وبعدين مفيش دلوقت سلف دلوقت فيه اختراع اخترعوه اسمه عدية هاههههههههههههه ولا انت ناوى تزوغ
:))))))))
ربنا يوفقكك ويكرمك يا رب ولما تبقى فاضى بقى ابقى اكتبلنا ال 153 موضوع بس بشويش يعنى واحدة واحدة هاهههههههههههه

3abdo me7tas said...

aya

وعليكم السلام ورحمه الله وبركاته
إنتى تشرفينى فى أى وقت يا ست آية
ويا ريت متبقاش بقى آخر مرة
أما بقى الإم بى فور أنا مش ناوى أجيبه لإنى والله مش فاضى الأيام دى عشان أسمع أو أتفرج كفاية الموبايل
عايزين نحوش بقى عشان نتأهل
:)
ولا إنتى رأيك إيه

.........................

رحيق الحب

أهلا أهلا ست هالة
أنا برضه اللى بقلد والله يا ستى ما أعرف إنك معاكى موبايل من أساسه
وثانيا انتى بتقولى ايه اختراع جديد إسمه إيه أصل أنا مش سامع كويس
ربنا يسهل ونبقى نشوف الموضوع ده
أما بقى بالنسبة لل 153 موضوع
فربنا يسهل بإذن الله
لا تقلقى أنا هروح المدونة بتاعتك عشان اشوف جديدها
;)

Unknown said...

هههههههههه مبروك ياسيدى

وعقبالنا يااااارب
:D

Unknown said...

كفاااره حمد الله علي السلامه
مبروك الموبايل يا عم خلاص بقي نقول ايه كاميرا و حركات
هاستنا الجديد

بنت أبيها said...

الف مبروك

3abdo me7tas said...

إنسانة

الله يبارك فيكي
عقبالك

..........

emy

الله يسلم
الله يبارك فيك
أما الجديد بقى إحتمال أكتبة دلوقتى لأنى متضايق أوى
واللى هيطلعنى الكتابة

................

بنت أبيها

نورتينا بس يا ريت متقطعيش الجوابات

Anonymous said...

بعد السلام اللي دام واللي انشاء الله يدوم اولا كل سنة وانت طيب عيد ميلاد الليلة مين عيد ميلاد النونا
وانشاء الله السنة دي تحقق اللي مش قدرت تحققه في السنة اللي فاتت وربنا يكرمك دايما باذن الله
وثانيا مبروك عليك الموبايل ابو كاميرا كويسه التهنئة دي ولا نزود تاني ياخ محمد
يلا بقي كفاياك كده عشان مش اطول عليك لا اله الا الله

Anonymous said...

نسيييت حاجه مهمة خالص

ثالثــــــــــــــــا
الف الف مبروك علي نبرة التشاوم اللي اتغيلرت واتحولت الي نبرة تفاول وفرح وتصالح مع الدنيا اكيد كل الي يعرفوك فرحولك وحيفرحوا ليك
يالا بـــــــــــــــــــــاي

3abdo me7tas said...

نفرتيتى

وإنتى طيبة يا ستى
عقبالك

:$

Anonymous said...

كل سنه و انت طيب يا محمد
و مبروك على الموبيل

Anonymous said...

ممكن يا محمد استعين بخبرتك
محمد انا عايز اغير اسم البلوجر الي

بونبوني والالوان

Anonymous said...

مبروك الموبايل الجديد والف مبروك لعيد ميلادك

و القادم....أجمل said...

اولا حمدلله علي السلامة
و مبرووووووووك الموبايل
ربنا يوفقك يارب في شغلك
و تحقق كل أحلامك

يارب

:)