Saturday, September 8, 2007

ممنوع الدخول لأقل من 8 سنين


أنا عارف انى إتأخرت كتير اوى اوى كمان بس كانت ظروف خارجة عنى ايرادتى وكمان فى ناس مش عايز اقول هم مين طهفونى بسبب تكملة القصة دى وكل شوية فين الباقى فين الباقى قلت عشان اخلس منهم بقى قلت اكملها وخلاص


احنا وصلنا لغاية فين فين فين آه لغاية ما روحنا نشوف العنبر يا ريت كده موسيقى تصويرية واضاءة خفيفة على المنظر

قلنا نروح نشوف فيه ايه فى العنبر وطبعا كلنا ماشيين على طراطيف صوابعنا والرعب ما سكنا من راسنا لرجلينا قمت انا بقى البطل بتاعهم مقرب من الباب وفاتحه براحه قال يعنى لو فيه عفريت ولا حاجه مش هيعرف المهم فتحت الباب ودخلنا وفتحنا النور وشوفنا حاجه محدش كان يتصورها انا محدش فى العنبر خالص لان كانو الصعايدة نزلو اجازة يوم بدرى عشان اللى بلده بعيده طبعا بعد الموقف ده كلنا وقفنا متنحين ومش عارفيفن نقول ايه عادى بقى المهم قفلنا العنبر بقى تانى وقلنا لو حد عدى وسلم علينا حتى والله ما احنا رادين خلاص انا سيبت الناس وروحت فى حته تانية عشان كان معاد تسليم النبتشية لزميل ليا وانا نايم طبعا كل الكلام ده فى الصحرا وانا نايم مع الناس بره فى الصحرا وخلاص روحت فى النوم قمت مخضوض حته خضة اقسم بالله العظيم اشد خضة فى حياتى صوت كلاب متوحشه والله وايه الصوت نفسه يرعب ما بالك منظر الكلام 3 كلاب جايين يتشاكلو جنب رجلى والله انا اول ما سمعت الصوت قمت منفوض من مكانى واقف مش عارف انا عملتها ازاى وطلعت اجرى وراهم مع العلم انى ساعتها كنت بكره الكلام موووت وبخاف منهم اوى حصل كتير وشوفنا كتير اوى فى دهشور

مواقف الترحيل

كنت انا مترحل فى رمضان كان ايام عذاب والله يوم الترحيل والواحد صايف يمشى فى الصحرا بالكام كيلو وهو شايل المخلة على كتفه كنا بنموت فعلا فعلا مفيش مواقف مرعبة حصلتلى فى الترحيل الا موقف واحد بس فى الفرقة قبل ما اروح اللواء بتاعى اول ما وصلنا الفرقة فى السويس كان النور قاطع وفضل قاطع مدة طويلة المهم لقيتهم بينادو على الأسامى واختارو 10 بس وانا كنت منهم قالو دول اللى هيبقة فى الميس والميس يعنى المكان اللى بناكل فيه المطعم والمطبخ وكده يعنى قلت بقى اشطة دا انا هعيش ولا ريتنى ما قلت قشطة طلع عسل أسود بعيد عنكم حد شاف اى فيلم للعبيد او اى حاجه من دى احنا كنا كده كنا احنا العشرة متبهدلين جدا اللى كان بيغسل الصوانى واللى كان بيقطع مش عارف ايه للغدى واللى كان بيمسح اما انا بقى كط
نت بعمل الحاجه الوحيده اللى فعلا ساعتها صعبت عليا نفسي اوى اوى بس قلت عادى خالص ياما هنشوف كنت بنزح الطرنش هتقولو يعنى ايه طرنش اقولكم الجيش مش فيه مجارى اوكى فا كل المية المستعملة او المجارى بمعنى اصح بتبقى فى حفرة كبيرة وبعدين عربية الشفط بتيجي كل مده تشفطها وكان ياعتها المطبخ الطرنش بتاعه مسدود وميت اللى هيفضى الطرنش العبد لله كانت بجيب صفايح الجبنه وآخد من الطرنش وارمى فى الشارع انا ساعتها كنت بدعى ان ربنا ياخدنى من اللى انا شوفته كنا فى رمضان وقعدنا نشتغل من الساعه 10 لغاية الساعه 2 بليل وبعدين قالو روحو نامو وتعالى الصبح الساعه 6 طبعا قبل ما ننام كل واحد اخد ربع فرخة بقى ونظام بس مين اللى ليه نفس والله كل واحد مقدرش ياكل حاجه ورمناها للكلاب المهم تانى يوم بقى صحينا ورضينا بالأمر الواقع خلاص احنا هنموت هنا ومرة واحده لقيناهم بينادو علينا عشان نمشى بدوزن تفاصيل واحنا ماشيين شوفنا منظر غريب اوى واحد راكبه جن تو عفريت عسكرى من اللى كانو فى الفرقة مش عارف بقى المهم الواد زى ما يكون عنده صرع او حاجه وعنيه بترمش بطريقة غريب وسريعه اوى اوى اوى واحد بيقولى اتشاهد فى ودانه قلت له اعمل ايه يا عم ما تعمل انت انا ساعتها كنت مرعوب طبعا انا مالى انا مش بحب الحاجات دى وسيبته ومشيت طبعا بقى ما ادراك من الاشاعات فى الجيش اللى يقول دا كان بيعمل زى الناس وشاف قطه قام عامل عليها قامت القطة نطت عليه ودخلت جوا بطنه لانها كانت من الجن واللى يقول ان الحمامات دى مات فيها واحد وعشان كده محدش بيخشها بليل

كلام كتييير اوى فى الموضوع ده


فى مرة كنا فى مشروع فى سينا فى ابو رديس لو حد عارفها بس كنا جوا فى الصحرا وكنت ساعتها برضه بخاف من الكلاب اوى فكانت الكلاب بتمشى من حوالينا واحنا نايمين على الأرض فانا كنت بتلكفت بالبطانية عليا عشان لو اى كلب قرب مش يشوفنى يعنى او اى عقرب او تعبان مش يقرصنى وطبعا انا مش جايلى نوم من الرعب اللى كان فى قلبى كنت مرعوب اوى اوى ومرة واحده لقيت صوت زميل لينا بيصوت ويجرى قلت بس الكلب عضه ولا حاجه ببص عليه لفقيته بيجرى زى المجنون فى من حوالينا صدقونى موقف صعب اوى اوى جيت اقرب منه قمت واخد ضربه تمام نيمتنى فى الارض قمت ومسكته وهدناه وبعد كده قلنا له فيه ايه يا ابنى فقال انه كان بيحلم بالتعابين والعقارب وفيعه تعبان قرصه فى رجليه قلت الله يحرقك حرقت دمنا طبعا اليوم ده مفيش فيه اى نوم
مواقف ليا حصلت بقى وانا كنت فى مشاريع فى حته اسمها مش فاكر والله الجفرة تقريبا حاجه زى كده دى كانت قريبه اوى من العاشر من رمضان وكنا بنبقى فى نص الصحرا يعنى بنمشى حوالى ساعه فى الصحرا لغاية ما نوصل صدقونى لما كنا بنام فى الصحرا وبنسمع صوت الديابة والحاجات دى اقسم بالله انا كنت بموووت انا اكتر حاجه بخاف منها الحيوانات دى بس قلت عادى الرب واحد والعمر واحد واقوم نايم والله من كتر خلاص فقدان الامل فى اى حاجه احنا كنا بنام جنب جحور التعابين والعقارب ولا فى الدماغ عادى بقى هنموت يلا خير هنعيش يلا خير برضه كانت ايام

ولا حته موقف بقى

كنا بنعمل خريطة لسينا على الأرض بالاسفنج وقعدنا نعمل فيها لغاية الساعه 2 بليل وروحنا نمنا الصبح الساعه 6 الصبح تخيلو لقيت ايه والله انا ساعتها قلت بس احنا انتهينا ببص على الخريط لقيت ....... انا هبط بعدين اكمل بقى

30 comments:

shahy said...

اول تعليق اهو علشان مش تكون زعلان

عن اذنك هاروح اقرا واجي تاني

سلام مؤقت

shahy said...

يا عيني
هو كل اللي بيدخل الجيش بيحصلة كدة؟ والا انت بس

حقيقي انا فطست من الضحك ومتخيلة شكلك لما قمت من النوم مفزوع وواقف هههههههههه
حقيقي خضة وحشة قوي ومع اني بحب الكلاب لكن لو كنت مكانك بعد الشر كنت هاعمل زيك ومش بعيد كنتوا تلاقوا مية على الارض
صحيح اعترف انت جريت بس ههههههههههه

كل دي خضات دة انت زمانك شعرك شاب

ممكن اسألك سؤال

ايوة طبعا

شكرا

انت بتحس بأية لما تفتكر الحاجات دي دلوقت؟

اكيد بتحمد ربنا ان الايام الوحشة دي عدت

اما بقى حكاية الطرنش دي
مش عارفة اقولك عليها اية
بس انا بسمعهم يقولوا النفس الحلوة ليها الجنة

والراجل اللي كان بيبربش دة يمكن فعلا كان عندة حالة صرع مش لازم يكون فية عفريت

ربنا معاك وتقدر تنسى الايام دي

اية دة
دة انا رغاية قوي
معلش بقى

سلام

Noony said...

يا خبر
لا عجب إنك بتكره الجيش
انت اتبهدلت يا بني
ربنا رحمك من الأيام دي خلاص الحمد لله
لقيته العنبر فاضي!!؟؟
وحكاية الطرنش دي ...الله يكون في عونك
وايه بس كمية الحيوانات اللي كانت بتعيش معاكم دي؟ قطط وكلاب وديابة وعقارب وتعابين!!!...هو فيه ايه بالضبط
وبرضه وقفت في نص الحكاية وقطعتها وحبة أساليب إثارة وتشويق عشان تشد رجل الزبون..ماشي يا عم...وماله، حك برضه
وبعدين هي الرقابة رفعت سن الأطفال من خمسة لتمانية ليه؟

بس انت ازيك؟
:)
نوني

Desert cat said...

انا ابن عمى كان بيجكى لى وهو فى الجيش كانوا بياخدوهم مكان فيه الغام وكان اللى يطلع لغم ياخد 10 جنيه واللى يدوس على لغم البقاء لله يبقا 100 حتة فى ثانية
قولت نعممممممم
ما عنه ما طلع انا اديهم هما ال 10 جنيه
قالى اللى مش تقدرى عليه بمزاجك اعمليه وبجميله
ده انتوا بتتبهدلوا وبيطلع عينكو يا شوباب وفى الاخر يا عينى بتتكافئوا برميتكو فى الشوارع طب يشغلوا اللى طفحوا الدم فى الجيش ويسيبوا اللى خدوا تأجيل عواطليه
كفاية كدا انا هتابع ياباشا اصلى بدأت اخرف
كنت بتقول لما صحيت من النتوم لاقيت الخريطة مالها

أكرم يعقوب said...

لأ لأ لأ لأ بجد والله ميصحش يعنى كل مرة تعمل فينا الحركة اللى مش حلوة خالص دى و تمشى و تسيبنا و ترمينا رمية الكلاب و متكملش و تنفضلنى برهة من الرمن بجد عيب أوى يا زميكى طاب راعى أخلاق الفرسان
بس بجد صباح الرعب و الحيوانات اللى انتو كنتو فيه ربنا يسترها على باقى شبيبة الشعب المصرى اللى مستنين أجلهم فى الجيش

و الحمد لله غنك خلصت الحوار السيء أوى دا

أكرم العوضى

Abeer said...

ههههههههههه
الحمد لله ان انا بنت وماليش جيش
يا عينييييييييي
ايه الادغال ديه
دنا حسيت بالفزع بدالك
ربنا يقويك والله

غمض عينيك said...

ايه يابو المحاتيس بس الرعب اللي انت معايشنا فيه ده
:)
الله يكون في عونك بجد
انا برد شفت حاجات كتير في الجيش لما اتفرجت عليه بالفيديو
ههههههه
:P
تحياتي ليك يامعلم

محمد سمير

Doba said...

لا حول ولا قوة إلا بالله
الحمد لله الذى عافانا مما إبتلى به الآخرين

الا احنا كنا هنعمل ايه فى الجيش لو دخلناه - يالهوى ده احنا كان زمانا فى الوبا مع هنادى

يلا حصل خير ان شاءالله
وحمد الله عالسلامة

اهو مخفتش المرة دى زى المرة اللى فاتت - نقطة تانية روح خدلك درس عربى علشان فيه اخطاء املائية كتير وجبتلنا حول وعمى حيسى

سلام يا دكتور
هبة

رينـــــــــــا said...

السلام عليكم ورحمه الله وبركاته
كل عام وانت اللى الله اقرب وعن المعصيه ابعد ان شاء الله
كل عام وانتم با الف خير

سجدة said...

ايه كل دا انت على كده كنت تاخد معاك كاميرا وتصور وتعمل فيلم تسجيلى وتبيع بقه فيه براحتك لكل القنوات الفضائية
ودا كان هيبقى اقوى فيلم رعب

malak said...

كل سنة وانت طيب ورمضان كريم


تحياتى

رحيق الحب said...

يا ساتر يا رب ده فعلا رعب ايه يا ابنى ده بجد الحمد لله انكو طلعتو منها على خير
انا عارفة ان اصلا الجيش بتاعنا لا آدمى ومعامله فيه زفت وحاجات طين فيه بس مكنتش عارفة ان الحكاية بالمنظر ده
بس اسمع انهم بيعملوا كدة عشان لو لاقدر الله فيه حرب تبقى الناس واخدة على ده فترة التجنيد ويربى فعلا رجالة مش بتوع بابى ومامى
يلا ربنا يكون وياكى ويعينكو يا رب
ما انتو برضو شباب مصر ورجالتها
:)

ما علينا said...

اولا كل سنة وانت طيب
وبالف خير
وربنا يتقبل صالح اعمالك

ثانيا
فين الرعب
انا بجد عايزة رعب بجد
ومنتظرة البقية يمكن
الاقي رعب بجد


منتظرة بقى

كل سنة وانت طيب
ورمضان كريم

koka said...

عمر الشقى بقى يا باشا .. والمهم انك رجعت بالسلامة ..

بس بردو انا واحدة من الناس اللى كان نفسهم يدخلوا الجيش ..

كفاية احساسك بالمسئولية وانك فى معسكر كده وكل شئ بيتم بنظام :)

بعتذر يا محمد عن تأخرى فى الرد بس انت عارف ظروفى بقى ..

ربنا يكرمك ويعوضك بأيام احلى من دى يارب :)

وكل سنة وانت طيب :)

3abdo me7tas said...

Shahy

اول تعليق ماشى يا ستى
ها قريتى ولا لسه :P

................

Shahy

ميه ايه يا شاهى بس
انتى بتقولى ايه
لالالالا مفيش حاجه من دى حصلت بس انا اتخضيت بجد كان موقف صعب

انا والله شعرى مش شاب ولا حاجه بس بدا يقع بقى أثر ظروف التعرية

ان لما بفتكر الحاجات دى يا ستى أولا بحمد ربنا على كل شئ
بس فيه حاجه انا لما بفتكر مواقف حصلتلى ساعات بتصعب عليا نفسي وببقى نفسي اعيط
بس
ومين اللى قال انك رغاية
لالالالا عيب عليكي
دا انتى مكتبتيش حاجه لسه
:P

3abdo me7tas said...

نونى
أختى الكبيرة
مش كبيرة اوى يعنى دا كلها سنه واحدة بس

شوفتى بقى انا بكره السويس له لانى شوفت العجب هناك
معلش بقى
بالنسبة بقى للحيوانات اللى انا قلت عليها والله بقت عادى خالص بالنسبة ليا دلوقتى لا بخاف منها ولا اى حاجه
دا انا لسه ههحكى على كمية حيوانات شوفتها فى المزرعة اللى انا كنت فيها اصبرى بس عليا
أناب قى الحمد الله تمام ازيك انتى

.....................
Desert Cat

لالالا مش مصدق حته الألغام دى انا شايف انها واسعه شوية حكاية اللغم دى

اما بالنسبة لنظام اللى دخل الجيش يشتغل واللى خد تأجيل مش يشتغل او يتعين
مينعفش يا بنتى لانك هنا فى مصر
انتى نسيتى ولا ايه

3abdo me7tas said...

Akram

لا يا مان انا مش سيبت حد ولا حاجه انا بس قلت ممكن الحكاية دى تبقى حلوة وكده يعنى

الحمد الله والله يا مان انى خلصت بس لا تقلق انا جايلى استدعى قريب
:D

..........................

ِAbeer

الحمد الله يا ختى انك بنت كنتى هتشوفى الويل
بس نعمل ايه دا فيه حاجات انا مقدرش أقولها من اللى شوفته

3abdo me7tas said...

أبو سمرة

انت فين يا عم من زمان انا كده زعلان منك اوى اوى اوى

كويس يا مان انك اتفرجت عليه بالفيديو بس دلوقتى اتمنعت حكاية الفديو دى وبقت سى ديهات
هبقى أشوفلم اسطوانه كده
:D

..............................

Doba

ازيك يا هبه وكل سنه وانتى طيبة

تصدقى انا برضه شوفت هنادى هناك وانا بعمل الطرنش

يا ستى انا بس يعنى اللى بغلط فى العربى ما كل الناس كده
ماشى ماشى يا هبه انا مش هكلمك انا ليا حساب مع سي يوسف

سلميلى عليه كتير

3abdo me7tas said...

رينا

وانتى طيبه
يا رب تكونى بخير

................

سجدة

كان نفسي والله اعمل فيلم وثائقى للموضوع ده

3abdo me7tas said...

Malak

وانت طيب
الله اكرم

...............

هالة

اولا ازيك انتى عاملة ايه
يعنى احنا لو حصل حرب مش هنبقى رجالة يعنى
لازم الحاجات دى
انتى عارفه الجيش كرهنى فى مصر اساسا
بس صدقينى لو حصلت حرب انا اول واحد هروح احارب

3abdo me7tas said...

ما علينا

وانت طيب يا جميل

والله انا عارف ان مفيش رعب وعارف ان البوست التانى اجمد من ده بس صدقينى انا مكنتش عارف انا كنت بكتب ايه الوحى بقى وما ادراكى ما الوحى

وانتى طيبه
الله اكرم

.....................

دعاء

ياااااااااااااااااه انتى لسه فاكرة دا انا نسيت
:P

المهم
كان نفسك يا ختى تدخلى الجيش والله انتى لو شوفتيه شريط فيديو كان اغمى عليكي
اقعدى ساكته يا ختى قولى الحمد الله
وبعدين احساس مين بالمسئولية دا اهانة وشتيمه و و و والحمد الله انا كنت فى مكان كويس جدا مكنش فيه كده بس انا كنت بشوف قدامى بلاوى سودة

وانتى طيبه يا دعاء

رحيق الحب said...

يعنى احنا لو حصل حرب مش هنبقى رجالة يعنى
لازم الحاجات دى
على حد سمعى يعنى وربنا ما يورينا وميعدهاش علينا ايام محدش يقدر يتخيل البلد لما تكون فى حاله حرب النسا بتكون عايشة ازاى وخصوصا الرجال اللى بيكونوا فى قلب الحدث نفسه تقريبا نفس اللى انت بتشوفه كده
ميه متعرفش جايبنها منين ومفيش اكل الجنود تبقى مضطرة تاكل اى حاجة وبلاش نقرف الناس اللى هنا:)
كدة يعنى عموما معلش المهم هيا فترة وعدت واكيد استفدت منها بحاجات
الواحد لما بيعدى عليه فترات سيئة مهما كانت بشاعتها بس بيستفيد منها مش كدة ولا ايه
وعايزين بوست جديد بقى بمناسبة رمضان بس مش عايزين رعب بقى

(green eyes) said...

انا فرحانه جدا اني شوفت البلوج بتاعك
من ساعه ما قريت البوست دا لحد دلوقتي وانا عماله اضحك... اكتر حاجه موتتني من الضحك الراجل اللي كان قاعد من سنه 73 ههههههههه
اكيد كل الحاجات دي هتبقى في ميزان حسناتك.....
بس الحمد لله دي ايام سودا وعدت واكيد كل ما هتفتكرها بعد كدا هتفضل تضحك عليها .. صحيح الجيش بيقولك اتصرف هههههههه

šσяšαяαα said...

أسأل الله لكم فى شهر رمضان حسنات تتكاثر وذنوب تتناثر وهموم تتطاير وأن يجعل بسمتكم سعادة وصمتكم عبادة وخاتمتكم شهادة ورزقكم فى زيادة..أدعو الله أن يتقبل منا و منكم الصيام و القيام وصالح الأعمال

Desert cat said...

ايه يا عبوووووووود فينك
هو انت صايم ولا ايه
فى انتظار الجديد ياباشا

غمض عينيك said...

انت فين ياعم محمد
فين باقي قصص الرعب بتاعتك
وبعدين مش بتزورني ليه
انت زعلان مني؟

3abdo me7tas said...

Mohamed

ان شاء الله قريب

.........................

رحيق الحب

انا بجد سعيد بوجوده يا هالة عندى هنا فى البلوج
بصى يا هالة بالنسبة للحرب دى حاجه تانية خالص خالص
انا زمان سمعت خبر بيقول ان امريكا كانت بتصنف الجنود بتوع العالم كله انتى عارفه الجندى المصرى كان تصنيفه ايه
ان الجندى المصرى تصنيفة غير آدمى عارفة يعنى ايه غير آدمى
يعنى ارميه فى اى حته وسبيه هيرجعلك تانى
:D:D:D
انا ياما شربت ميه مش عارف ايه مصدرها وكلت اكل مش عارف ايه مصدره برضه بس الجوع والعطش وحش اوى اوى اوى

الحمد الله ربنا ما يرجعها ايام
اما بقى بالنسبة لبوست جديد والله يا هالة انا تعبان جدا ومش قادر اكتب اى بوست

3abdo me7tas said...

green eyes

اهلا بيكي فى البلوج وانا أسعد بجد انك شرفتينى

الحمد الله على كل شئ
ومرة تانية اهلا بيكي فى البلوج

...................

ŞoŖśậŖấầ

آمين يا رب العالمين

3abdo me7tas said...

Desert Cat

شوفتى بقى طلعت صايم
:P


.....................

أبو سمرة

ازيك يا عم انت فين من زمان
لا والله بس شوية تعب كده وربنا يسهلها وهلزق عندك قريب لا تخاف

من القلب said...

كل سنة وانت طيب و بخير
و صيام مقبول ان شاء الله :)