الجزء الثانى

بسم الله الرحمن الرحيم

وصلنا مركز التدريب طبعا كل واحد جايب معاه أكل وحاجات كتير واللى البيت عامل لابنه أكل بالهبل عشان جيش وبتاع
بس انا مكنتش متعود على كده أساسا
لقينا الظباط والصف ضباط بيقولو كل واحد معاه أكل يحاول ياكله او يرميه لان ممنوع دخول أى أكل فى المركز
طبعا كان موقف جامد كل واحد قاعد فارش قدامه الأكل وهات يا أكل مع ان الناس كانت شبعانه بس يقولو أهو احسن ما نرميه
انا الحمد الله فى اليوم ده مكنش ليا نفس لأى حاجه
مش عارف ليه
يمكن عشان دخلت الجيش
عادى ما اى واحد معرض انه يدخل الجيش
ولا يمكن عشان اول مرة يبعد عن حبيبه ومش عارف يكلمه او يطمن عليه مش عارف بجد
المهم
قعدنا لغاية المغرب كده وقالو كل واحد ييجى عشان ياخد حقنتين قال ايه ان الحقنتين دول هيحمو الواحد من جميع الأكراض اللى الواحد ممكن يشوفها فى الجيش لمده 6 شهور طبعا عادى أخدت الحقنتين فى دراعى وعلى البركة
قعدنا لغاية الساعه 2.30 بليل مستنيين دورنا فى استلام المخلة
وطبعا محدش يقولى يعنى ايه مخله عشان نزعلش منه
مش هطول عليكم ومش هقولكم اد ايه الواحد اتخنق من الانتظار لغاية ما نستلم المخلة دى
بس الحمد الله استلمنا وودونا على عنبر عشان ننام
وصلنا بالظبط الساعه 4.30 العنبر طبعنا انا نمت بهدومى مقدرتش اغير وغير كده اى حاجه فى اى حاجه المهم انى لقيت سرير وخلاص يا عم
الساعه 5.30 الفجر يعنى الواحد غمض عنيه نص ساعه بس بالظبط
يلا كله يجمع عشان طابور اللياقة
لياقة ايه يا جدعان اللى بتقولو عليه انا عايز اناااااااام
ولا حياه لمن تنادى
ومن ساعتها انا اكتر مده ممكن انامها لغاية دلوقتى والله 5 ساعات بالظبط مهما عملت
طبعا مكنتش اعرف حد لسه وكان العنبر بتاعى كان الفصيلة السابعه وكان كله من الغربية وكنا حوالى 6 او 7 من المنصورة وبقيت الأربعين من الغربية من مناطق متنوعه يعنى
:)
تصنيف المجوعات فى الجيش عشان محدش يتكلم كتير
الجيش بعده الفرقة بعده اللواء بعده الكتيبة بعده السرية بهدع الفصيلة بعده المجموعه

اليوم المعتاد لمركز التدريب
بنصحى الصبح طبعا والشمس أساسا لسه مطلعتش بقعد نجرى وبتاع وهبل فى الجبل اى حاجه فى اى حاجه ونقعد نعمل عملية نظافة فى المركز زبالين يعنى
نروح نتشطف ونغير هدومنا
الفطار
وبعدين نظبط العنبر عشان بيتفتش علينا
وبعدين طابور الصبح وطابور الثبات
ييجى بعد كده عساكر بس اقدم مننا مش فاكر اسمهم بصراحة يعلمونا حاجات ملهاش اى برناج فى اى حاجه ومش فاكر نعمل ايه تانى وبعدين الغدا وراحة وبعدين الساعه 5 طابور الهتاف عشان بس نغير الوجهه بتاعت الشمس الصبح الشمس بتبقى فى اليمين فالنص اليمين يبقى أسود وفى الهتاف الشمس تبقى فى الشمال فنكمل لون البشرة بالأسود الخالص بقى وده اللى استفدته من طابور الهتاف
وبعدين راحه بقى وعيش حياتك
طبعا انا كنت بنام قبل الفراخ مش معاها والله من التعب واللى كنت بشوفه كنت بنام الساعه 10 بليل
المهم نخش فى الموضوع
كنت تعبان اوى اوى مش تعب جسدى لا
تعب نفسي
كل يوم بيمر عليا بكون مش مصدق من اللى بيحصلى ده
غير كمان بعدى عن الإنسانه اللى بحبها ومش عارف عنها اى حاجه
غير حكم النفس على النفس
مع انى كنت بنزل كل يوم خميس أجازة ونيجي الجمعه بليل بس بس
مش عارف
على العموم كفاية كده لانى طولت اوى انا قلت لكم النظام والبوست الجاى هيبقى بقى بأحداث حصلت ليا فى مركز التدريب غير النظام اللى شوفته وهقول بكل صراحة اللى حصل

الجزء الأول

بسم الله الرحمن الرحيم

فى الأول هقول كلمتين
حكايتى فى الجيش أنا هكتبها كلها بما فيها المواقف اللى حصلتى فعلا جوا الجيش أو الحالة النفسية أو العاطفية وممكن تكون كمان بالتواريخ على ما أتذكر يعنى
وآسف لو ذكرت حد فى القصة دى
أنا عارف انى طريقتى فى كتابة القصة من الممكن إن فيه ناس هتتخنق منى بالنسبة إنى بكتب كل حاجه بالتفصيل
بس أنا بحب كده مش عارف ليه
نبدأ

خلصت كلية فى آواخر سنه 2004 وقعدت أستنى الجيش حوالى 11 شهر وده أول حاجه تعبتنى وضيعت منى حاجات كتير
كنت فى السيبر بتاعنا كنت قاعد فيه ليل نهار وكانت الحالة العاطفية عسل وكنت مع البنت اللى بحبها وكانت بتحبنى اوى
وفى شهر 6 جه معاد تقديمى للجيش
طبعا كان الموقف عادى بالنسبة ليا كنت حاطط إحتمال إنى أخش الجيش بنسبة 90% بحيث لو دخلت مش أتعب نفسيا
كل حاجه إتطلبت منى عملتها لغاية اليوم اللى كان فيه نتيجة الإرجا والإرجا اللى هى انى ادخل الجيش ولا لا
كلنا كنا قاعدين على أعصابنا كنت ميت من القلق خايف خايف ان كل حلم حلمته يتدمر بدخولى الجيش
حلمت كتير أوى كتير كنت ساعتها بطلت سجاير من زمان المهم قاعد باكل فى ضوافرى ومستنى النتيجة
من غير ما ندخل فى تفاصيل وحظ وبتاع لبست
دخلت الجيش ظابط إحتياط
فى اليوم ده أنا شربت كمة سجاير كان حوالى 6 سجاير ما أنا مبطل بقى
قعدت مش مصدق نفسي عارفين لما الواحد بيطلع فى الروح وشريط حياته بيمر قدام عنيه بسرعه أنا كنت كده بس مكنش شريط حياتى كان كل حلم أنا حلمته
كنت بحلم إنى أشتغل وأخطب وأتجوز الإنسانه اللى بحبها وبتحبنى ونبقى مع بعض طول عمرنا
كان فى اليوم ده كنت متوقع إنى آخد تأجيل وكنت ناوى أعمل حفلة وهروح أقابل حبيبتى فى كليتها ونفرح مع بعض
لاكن لما لبست صدمت إتصلت بيا عشان تتطمن قلتلها خلاص أنا دخلت الجيش
مسمعتش صوتها ممكن عشان أنا كنت أمل ليها إننا نبقى مع بعض أو صدمة مش عارف المهم قعدت عشان ياخدو عينه دم عشان فيرس سى كان فيه ناس بتتمنى ان يكون عندها الفيرس عشان ميدخلوش الجيش
بس أنا كان عادى بالنسبة ليا هعمل إيه يعنى خلاص اللى حصل حصل روحت البيت عادى بليل كلمتها
قلت لها أنا دخلت الجيش وظابط كمان وعايز أسألك سؤال أنا قدامى كتير هتستنينى
قالت لى هستناك ومش هسيبك
فات يوم اتنين وجالى امتحان الهيئة عشان الظباط نجحت للأسف ودخلت ظابط بس الحمد الله جبت واسطة ونزلت عسكرى الحمد الله مع ان جه أيام كنت أتمنى أبقى فيها ظابط عشان الذل اللى أنا شوفته
نزلت عسكرى وجه يوم التسليم أول يوم ليا فى الجيش يوم 12/7/2005
المكان فى منطقة تجنيد الهرم
المعاد الساعه 7.30 صباحا
روحت لقيت ناس كتير اوى اوى
قعدنا فى الشمس لغاية الساعه 2.30 عشان هنتوزع كل واحد على سلاحه ومركز التدريب
كان فيه شنطه بيبعوها غصب على الناس كانت ب 20 جنيه فيها ورنيش ورباط بيادة ومعجون أسنان وحلاقة كده يعنى حاجات متجيش ب 5 جنيه بس كان لازم نشتريها
كنا فى شهر 7 وكان الحر جميل عسل لغاية ما الواحد كان بيبوش من الشمس جه الوقت عشان نعرف هنروح فى أنهى مكان للتدريب
والحمد الله كان مكانى فى مركز تدريب 3 مشاه فى قويسنا ركبنا الأتوبيسات وروحنا على محطة القطر عشان هنركب القطر الحربى اللى هيودينا قويسنا
وصلنا مركز التدريب
نكمل أول يوم فى الجيش فى البوست الجاى

إستفتاء

بصراحة أنا مش عارف أكتب إيه
بس جيت حاجه فى دماغى وعايز رأيكم فيها
أنا دلوقتى ناوى أكتب قصة حياتى فى الجيش
كلها كاملة
أنا قبل كده كتبت أجزاء منها بس عايز أكتبها من الأول وكاملة لغاية يومنا الحالى
بس عايز أعرف رأيكم الأول أكتب ولا لآ
أنا طالب بس 30 رد بالموافقة
30 رد بس عشان أبدأ أكتبها
سواء كانت من أشخاص أعرفها أو أشخاص مجهولة

أوقف المخدرات - غير حياتك

بسم الله الرحمن الرحيم


النهاردة وأنا فى الشغل كنت فايت على بلد إسمها ميت سلسيل
المهم
وأنا فايت بالعربية لقيت يافطة كبيرة مكتوب عليها
أوقف المخدرات غير حياتك
الجملة دى شدتنى أوى وكمان الرسمة اللى مرسومة
وكان كمان مكتوب أكتر من 10 أرقام تليفون موبايل لأى حد عايز يتعالج من الإدمان أو يعرف حد مدمن وعايز يعالجة
قلت فى نفسي يااااه كان فين من زمان الكلام ده
وطبعا كلنا عارفين موضوع الإدمان اللى انا كنت كتبته والقلم اللى أكلته على خدى
يلا خير
المهم
قلت أول ما أرجع البيت أدور على الحملة دى ولقيتها فعلا وطلعت تبع موقع الأستاذ القدير عمرو خالد
ربنا يكرمه يا رب
أنا جوايا كلام كتير عايز أقوله
بس كفاية الفرحة اللى أنا فيها بجد